Фото: Халқ сўзи

Наманган вилоят ҳокимлиги ҳузуридаги Медиа департаментининг «Мунозара» платформасида ёшлар билан учрашган Электрон ҳокимиятни ривожлантириш маркази раҳбари Бахтиёр Ахунбабаев бу ҳақида маълум қилди. Ахборот технологиялари, архитектура, график дизайн ва инглиз тилини чуқурлаштирилган тарзда ўрганаётган йигит-қизларга соҳадаги бошқа янгиликлар хусусида ҳам батафсил тушунча берилди.

Таъкидланганидек, 2021 йилда Тошкент шаҳри, Наманган ва Самарқанд вилоятлари IT хизматлар экспорти бўйича республикада энг яхши натижа кўрсатган ҳудудлар мақомига эга бўлди. Жумладан, Наманган вилояти IT-Park резидентлари ҳисобланган EuroSoft ва Site Labs компаниялари экспорт ҳажми бир миллион долларни ташкил этди.

Шуни алоҳида таъкидлаш лозимки, Наманган вилоятида мазкур замонавий соҳа янги поғонага чиқмоқда. Тез кунларда Наманган шаҳри ва Поп туманида вилоятдаги илк BPO марказлар ҳам ўз фаолиятини бошлайди. Бу ўз навбатида хизматлар экспортини икки баробарга ошириш ва юзлаб ёшларни даромадли иш билан банд этишга хизмат қилади.

BPO — бу инглизча Business Processing Outsourcing сўзларининг аббревиатураси бўлиб, бундай ташкилот мукаммал дастурий таъминот, коммуникация ва коммуникабелликни уйғунлаштирган ҳолда хизмат экспортини амалга оширади. Наманганда ташкил этиладиган BPO марказлар Американинг Jet Ruck ҳамда RevoTech компанияларига хизматлар экспортини амалга ошириши мўлжалланган.

Қудратилла НАЖМИДДИНОВ, «Халқ сўзи».