Ўзбекистонда жорий йилнинг март ойида 20 та банк жаримага тортилди. Бу ҳақда Марказий банк хабар берди.

Маълум қилинишича, Марказий банкнинг Банк назорати қўмитаси томонидан 2026 йилнинг март ойидаги йиғилишлар (жами 7 та) давомида 29 та масала кўриб чиқилган ва улар бўйича тегишли қарорлар қабул қилинган.

Рўйхатга олиш ва рухсат бериш йўналишида жами 17 та масала, шу жумладан, кредит ташкилотлари уставига киритилган ўзгартиришларни рўйхатдан ўтказиш (4 та), кредит ташкилотларининг устав фондидаги улушига эгалик қилиш учун рухсат бериш (3 та), банкларда аудит ўтказиш ҳуқуқини бериш учун аудиторлик малака сертификатини тақдим этиш (1 та), шунингдек, тижорат банклари кузатув кенгаши ва бошқаруви аъзолари ҳамда муҳим аҳамиятга эга ходимларининг номзодларини кўриб чиқиш (9 та) билан боғлиқ масалалар кўриб чиқилган.

Шу билан бирга, кредит ташкилотларининг молиявий ҳолатига оид 12 та масала кўриб чиқилган. Хусусан, Марказий банкнинг кўрсатмалари ва пруденциал меъёрлари талабларининг бажарилиши, банк ва нобанк кредит ташкилотларида ўтказилган инспекция ҳамда ўрганишлар натижалари, шунингдек, ташкилотларнинг молиявий хизматларини «тартибга солиш қумдони» доирасида синовдан ўтказиш масалалари муҳокама қилинган.

Бундан ташқари, пруденциал норматив талабларига риоя этилмаганлиги ҳамда ўз фаолиятини қонунчилик ҳужжатлари талабларига белгиланган тартибда мувофиқлаштирмаганлиги учун 17 та банкка нисбатан чора ва санкциялар қўлланилиши тўғрисида огоҳлантирилган.

Таъкидланишича, қонунчилик талабларига мувофиқ фаолиятини ташкил этмаганлиги, шунингдек, инспекция ва ўрганишлар давомида аниқланган камчиликлар учун 20 та банк, 89 та микромолия ташкилоти ва 79 та ломбардга нисбатан жарима санкциялари қўлланилган.