Фото: www.google.com

Ижтимоий тармоқларда Малайзиядан коронавирусга чалиниб келган сайёҳлар Ўзбекистонда бу касалликни бошқаларга тарқатгани тўғрисида маълумотлар пайдо бўлди. Вазиятга аниқлик киритиш учун “Kun.uz” сайти Соғлиқни сақлаш вазирлиги билан боғланди:

– Чиндан ҳам Малайзиядан 27 кишилик сайёҳлар гуруҳи 13 март куни Ўзбекистонга кириб келган ва улар Тошкент, Қарши, Хива, Бухоро ва Самарқанд шаҳарларида бўлишган. 18 март куни улар поездда Самарқанддан Тошкент томон келаётган пайтларида меҳмонлардан бирида касалликка хос белгилар – тана ҳарорати ошиши, томоқ оғриғи, умумий ҳолсизлик кузатилган.

Бу бўйича Соғлиқни сақлаш вазирлигига хабар берилганидан сўнг шифокор ва эпидемиологлардан иборат махсус гуруҳ уларни кутиб олган. Бемор 18 март куни соат 20:00да “Тошкент” вокзалидан зудлик билан Эпидемиология, микробиология ва юқумли касалликлар илмий текшириш институти клиникасида тиббий назорат учун ётқизилган.

Вагонда бўлган 26 нафар Малайзия фуқаролари махсус ажратилган жойда карантинга ётқизилди ва улардан ҳам текшириш учун намуналар олинди.

Шукрки, у беморга коронавирус юққанлиги тасдиқланмади, қолган 26 нафар меҳмонда ҳам бу касаллик аниқланмади. Шундан сўнг бугун тонгда барча меҳмонлар ўз юртларига кузатиб қўйилдилар.

Малайзиялик меҳмонлар шифокорларимизнинг уларга кўрсатган эътиборидан, барча чора-тадбирлар ўз вақтида ва тартиб билан ўтказилганидан мамнун эканликларини билдирдилар ҳамда жараёнда иштирок этганларни халқаро алоқалар қайта тикланганидан сўнг ўз юртларига боришга таклиф этдилар – деди вазирликнинг жамоатчилик билан алоқалар бўлими раҳбари Фурқат Санаев.