Саминжон ҲУСАНОВ/«Халқ сўзи». Мутахассисларнинг маълум қилишича, босма нашр электрон нашрга нисбатан 70 фоиз ортиқ таъсир кучига эга экан. Шу боис бутун жаҳонда ижтимоий тармоқлар кенг оммалашган бўлсада, кутубхоналарга эҳтиёж ҳамон сақланиб қолмоқда.

Марҳамат туманида кутубхона учун янги бино қурилиб, фойдаланишга топширилди.

— Шу пайтгача муқим бинога эга эмас эдик, — дейди туман ахборот кутубхона маркази мутахассиси Дилфузахон Солиева. — Ўқувчи битта китобни олиб, уни қайтариб беришга келса биз бошқа бинога кўчган бўлардик. Шу тариқа нафақат кутубхоначилар, балки китобхонлар ҳам сарсон эди. Ҳозир эса Муҳаммад Юсуф номидаги хиёбонда жойлашган икки қаватдан иборат, барча қулайликларга эга бўлган бинода фаолият олиб бормоқдамиз. Ушбу лойиҳанинг фойдаланишга топширилишини китобхонлик маънавиятини оширишга эътиборнинг ифодаси, деб биламан.

15 минг нафар китобхонга эга бўлган кутубхона биносининг очилиш маросимида Алишер Навоий номидаги Ўзбекистон Миллий кутубхонаси томонидан 100 миллион сўмлик сертификат топширилди. Ушбу маблағ кутубхона фаолиятини янада кенгайтириш, адабиётлар фондини ошириш, китобхонларни мутолаага жалб этиш каби мақсадларга йўналтирилади.