Фото: РИА «Новости»

Россия Федерацияси Федерал хавфсизлик хизмати Москва, Екатеринбург ва Омск шаҳарларида “Крокус Сити Холл”даги терактга алоқадорликда гумон қилинган яна уч нафар Марказий осиёлик фуқарони қўлга олди. Бу ҳақда Россия Федерацияси Федерал хавфсизлик хизмати жамоатчилик билан алоқалар маркази маълум қилди.

“Россия Федерацияси Федерал хавфсизлик хизмати Москва, Екатеринбург, Омск шаҳарларида 2024 йил 22 март куни “Крокус Сити Холл”да содир этилган террорчилик актида иштирок этган Россия фуқароси ва икки нафар чет эл фуқароси – барчаси Марказий Осиё минтақасидан келган муҳожирларни қўлга олди”, дейилади баёнотда.

Федерал хавфсизлик хизмати ҳибсга олинганлардан икки нафари ҳужумда ишлатилган қурол ва транспорт воситаларини сотиб олиш учун пул ўтказганини аниқлашга муваффақ бўлган. Учинчиси терактнинг шерикларини ёллаган ва жиноятчиларни молиялаштирган.

Оператив кадрларга кўра, хавфсизлик кучлари икки гумонланувчидан нима учун ҳибсга олинганини сўраганида, улар “Крокус”даги теракт учун” деб жавоб беришган.

Бунгача ушбу терактда алоқадорликда гумон қилинган 11 киши қўлга олинганди.

Шу йилнинг 22 март куни кечқурун бир гуруҳ террорчилар “Пикник” гуруҳининг концерти ва рақс спорти бўйича Россия чемпионати бўлиб ўтаётган “Крокус Сити Холл” биносига ҳужум қилди. Жиноятчилар ташриф буюрувчиларга қарата ўқ узди, шунингдек, концерт залига ўт қўйди.

Фавқулодда вазиятлар вазирлигининг сўнгги маълумотларига кўра, ҳужум оқибатида 144 киши ҳалок бўлган.

Олдинроқ, Россия президенти Владимир Путин «Крокус Сити Холл»даги терактга буюртма берганларга етиб боришга ваъда берганди.