Барча соҳаларнинг ривожланишига тўсқинлик қилувчи иллат — коррупцияни йўқ қилиш ҳар доим барча жамият ва давлатлар олдидаги асосий муаммолардан бири бўлиб келган. Бутунлай йўқ қилиб бўлмайдиган мазкур ҳодисанинг ривожланишига йўл қўймаслик, уни бартараф қилиш учун умуммиқёсда биргаликда ҳаракат қилиш мақсадида 2003 йил 9 декабрь куни Мексикада БМТнинг коррупцияга қарши конвенцияси имзоланган ва ушбу кун Халқаро коррупцияга қарши курашиш куни деб эълон қилинган. Мазкур сана 2004 йил 9 декабрдан бошлаб Халқаро коррупцияга қарши курашиш куни сифатида нишонлаб келинади.

Шу муносабат билан, республикамизда ҳам Коррупцияга қарши курашиш агентлиги томонидан Аксилкоррупция ҳафталиги ташкил этилди. Ҳафталик доирасида деярли барча идора ва ташкилотлар билан ҳамкорликда тадбир ва тренинглар ўтказилмоқда.

Жумладан, 2021 йил 6 декабрь куни агентлик томонидан «Коррупцияга қарши курашишда жамоатчилик билан ишлашнинг роли» мавзусида нодавлат нотижорат ташкилотлар ва оммавий ахборот воситалари учун тренинглар ташкиллаштирилди.

Тренингда Ўзбекистон Республикаси Коррупцияга қарши курашиш агентлиги вакиллари, хорижлик мутахассислар ва бир қатор НТТлари вакиллари иштирок этди.

Коррупцияга қарши курашиш агентлиги директори Акмал Бурханов агентликнинг йил давомидаги ўрганишлари, ҳаракатлари натижалари, нодавлат нотижорат ташкилотлари билан ҳамкорликни кучайтириш масалалари хусусида хулосаларини билдирди: — Дунёнинг кўпгина ривожланган мамлакатларида коррупцияга қарши курашувчи институтлар тизими шакллантирилган. Масалан, коррупцияга қарши курашиш суди, коррупцияга қарши курашиш бюроси ва ҳоказо. Бу институтлар, албатта, ўз самарасини бериб, коррупцион ҳолатларни аниқлаш, камайтириш, тегишли шахсларни жазолаш чора-тадбирларини такомиллаштиришда асосий омил бўлмоқда. Келгусида мамлакатимизга ҳам шундай институтларни олиб кириш, барча ташкилотлар билан ҳамкорликни йўлга қўйиш, ошкораликни таъминлаш мақсадида бир қатор лойиҳаларни режалаштирдик.

Шунингдек, тренингда БМТ Тараққиёт дастурининг коррупцияга қарши курашиш ва бошқарув масалалари бўйича Ўзбекистондаги маслаҳатчиси Хачик Харутюнян ва БМТ ТД Коррупцияга қарши курашиш лойиҳаси компонент раҳбари Нодира Зикриллаева мазкур соҳа бўйича халқаро тажрибалар, хулосалар ҳақида сўз юритишди ва «Антикоррупцион лаборатория»лар ташкил этиш лойиҳасининг тақдимоти намойиш этилди.

Ташкил этилган савол-жавоб ва амалий машғулотлар жараёнида НТТ вакиллари ўртасида турли мунозаралар ва келишувлар бўлиб ўтди.

Мазкур ҳафталик, хусусан, тренинг соҳадаги камчиликларни бартараф этишда ўз натижасини кўрсатишини кутиб қоламиз.
 

Мадина Ғузорова, «Халқ сўзи».