Ҳасан ПАЙДОЕВ - “Халқ сўзи” 

Шу кунларда юртимизнинг бошқа ҳудудлари сингари Қорақалпоғистон Республикасида ҳам Иккинчи жаҳон урушида фашизм устидан қозонилган ғалабанинг 76 йиллиги ҳамда Хотира ва Қадрлаш куни байрамига катта тайёргаргарлик кўрилмоқда.  Тадбирларда Иккинчи жаҳон уруши қатнашчилари ва меҳнат фронти фахрийлари ҳолидан хабар олиниб, байрам совғалари тақдим қилинаётир. 

Қорақалпоғистон Республикасидан Иккинчи жаҳон урушига 66 минг нафардан ортиқ киши кетган бўлса, 34 мингдан зиёди ўша жанг майдонларида мардларча ҳалок бўлган ёки бедарак йўқолган.

Бу йил Қорақалпоғистонда 6 нафар уруш қатнашчиси ҳозирги нурафшон замонамизга шукроналик келтириб, байрамни хурсандчиликда кутиб олмоқдалар. Нукус шаҳрида ҳамда Хўжайли, Қонликўл, Қораўзак, Қўнғирот ва Тўрткўл туманларида умргузаронлик қилиб келаётган отахонлар ҳар куни ҳурмат- эътиборда.

Хўжайли туманида яшовчи Нурулла ота Исаков 18 ёшида урушга отланган эди. Ҳозирда 96 ёшни қоралаган отахон уруш йилларини эсларкан, бугунги нурафшон кунларга шукроналик келтиради. Юртимизда Президентимизнинг уруш ва меҳнат фахрийларига кўрасатаётган ғамхўрликларидан миннатдор эканлигини алоҳида эътироф қилади.

Бугун Нурулла отанинг хонадонида байрам муносабати билан тадбир ўтказилди. Унда туман прокуратураси, “Нуроний” жамғармаси, ўқувчи ёшлар, кенг жамоатчилик вакиллари  ва оммавий ахборот воситалари вакиллари иштирок қилди. 

— Нурулла отанинг орамизда борлиги биз учун фахр, — дейди “Нуроний” жамғармаси Қорақалпоғистон Республикаси Хўжайли тумани бўлими бошлиғи Таввакал Абдухаликов. — Шу ўринда Нурулла отамиз ҳақида қисқача маълумот бериб ўтсам. Бу инсоннинг жасорати, кўрган кечирганлари, қилган меҳнатлари ёш авлодга ибрат, албатта. Нурулла Исаков 1943 йил сентябрь ойида ҳарбий хизматга чақирилиб, 1944 йил январь ойида II-Беларуссия фронтига юборилган. Витебск  йўналишида хизматда бўлади, 1944 йил январь, февраль ойларида жангда иштирок этиб, 5 февраль куни чап қўлидан ярадор бўлади. Ярославль шаҳридаги госпиталда даволаниб, шу йили март ойида 202-сонли ўқчилар полигонининг ўқув батальонида кичик командирлар тайёрлаш курсини тамомлаган.

Сержант ҳарбий унвонини олиб, II-Беларуссия фронтининг Могилёв йўналишига юборилган. Шу йўналишда июнь ойида жангда иштирок этиб, Беларуссияни немис фашистларидан озод этишда қатнашади. 1944 йили 4 июль куни Польша шаҳрида Н.Исаков оёғидан оғир ярадор бўлади. Сўнг Чувашистон Автоном Республикасидаги госпиталда даволанади. 1944 йил октябр ойида II гуруҳ уруш ногирони бўлганлиги учун уйига қайтарилган. 1983 йил 20 мартда “Меҳнат фахрийси”, Давлат мукофоти 1994 йил 6 майда “Жасорат” медали билан тақдирланган. 

Шунингдек ўтган йиллар давомида Иккинчи жаҳон уруши қатнашчиси сифатида ғалаба байрами муносабати билан ўнлаб юбилей медалллари билан тақдирланган.

Нурулла ота каби юртдошларимиз кўрсатган жасоратни бугунги кун ёшларига етказиш учун ҳам улар билан кўпроқ суҳбат қурамиз. Негаки, улар гарчи орамизда бўлсаларда, биз кинолардагина кўрадиган жанг майдонларида иштирок қилган ва уларни бизга гапириб бераётган тарихий шахслардир.

Нурулла ота турмуш ўртоғи Ҳамида Юсупова билан биргаликда 3 нафар ўғил ҳамда  6 нафар қизни камолга келтирди. Айни пайтда 40 нафар невараси ва 42 нафар чеваралари ардоғида ҳаёт кечириб кeлмоқда. 

Байрам муносабати билан уюштирилган тадбирларда отахоннинг кайфияти янада кўтарилди. Айниқса, санъаткорлар ва ўқувчи ёшлар ўша пайтдаги ҳарбийларнинг қўшиқларини ижро этганида Нурулла ота ҳам жўр бўлиб куйлай бошлади...

Маълумот учун Хўжайли туманидан жами 7594 нафар киши Иккичи жаҳон урушига кетган бўлса, шундан  2280 нафари қайтиб келган. 3652 нафари ҳалок бўлган, 1004 нафари турли даражада ярадор бўлган, 600 дан ортиғи бедарак йўқолган.

Оролбўйи туманларида “Хотира бор экан — миллат барҳаёт”, “Эътибор ва ғамхўрлик — инсоний бурч” шиорлари остида ўтказилаётган тадбирлар давом эттириляпти.

Ғайрат ОТАЖОНОВ
“Халқ сўзи” 

Ҳасан ПАЙДОЕВ олган суратлар.