Фото: Reuters

Хитойнинг Россияга қурол жўнатиш масаласини кўриб чиқаётган белгилари кўринмоқда, бироқ ҳозирча бу амалга оширилмаган. Худди шундай фикрларни НАТО бош котиби Йенс Столтенберг айтиб ўтди.

«Биз Хитойдан Россияга ҳеч қандай ҳалокатли қурол жўнатилганини кўрмадик, аммо улар буни ўрганаётгани ва буни режалаштираётгани белгиларини кўрдик», дейди Столтенберг.

Аввалроқ, Хитой Ташқи ишлар вазирлигининг расмий вакили Ван Вэнбинь Пекин Россия армиясини қурол-яроғ таъминлаётгани ҳақидаги гап-сўзларни «АҚШ разведкаси»нинг миш-миши ва туҳмати деган эди.

Дипломатнинг таъкидлашича, Хитой Россиянинг Украинадаги махсус ҳарбий операцияси бошиданоқ конструктив роль ўйнаб, томонларни музокараларни қайта бошлашга ва барча муаммоларни тинч йўл билан ҳал қилишга ишонтиришга ҳаракат қилган.

Шу билан бирга, у Украина томонига энг йирик қурол етказиб берувчи бўлган АҚШ Хитой Халқ Республикасига қарши доимий равишда Россияга қурол етказиб бериш ҳақидаги сохта айбловларни илгари сураётганини таъкидлади.

Ван Вэнбиннинг айтишича, бу Украинадаги можарони ҳал қилиш жараёнини секинлаштиради ва Хитой-АҚШ муносабатларига ҳам путур етказиши мумкин.