Навоий вилояти ҳокими ҳамда Хитойнинг “Youkang Agriculture” корхонаси раҳбарияти ўртасида янги 10 млн. долларлик инвестицион лойиҳа муҳокамаси бўлиб ўтди.

Унга кўра хитойлик сармоядорлар Навоий вилояти ҳудудида биринчи йилнинг ўзидаёқ 10 минг тоннагача балиқчилик тармоғи учун зарур бўлган ем маҳсулотларини ишлаб чиқариш имкониятига эга завод ҳамда Қизилтепа туманидаги Тўдакўл сув ҳавзасида беш минг тонна балиқ етиштириш шароити бўлган балиқчилик хўжалигини қуриш истагини билдиришди.

Ҳамкорликдаги мазкур икки лойиҳа келажакда Навоий вилоятида балиқчилик саноати равнақига кучли туртки бериши ҳамда бу борада ҳудуд имкониятларини янада кенгайтириши таъкидланди. Маълумот учун таъкидлаш жоиз вилоятда жорий йил якуни билан 20 минг тонна балиқ ишлаб чиқариш кутилмоқда. “Youkang Agriculture” корхонаси раҳбарияти шу куннинг ўзидаёқ Навоий вилоятида «хорижий корхона» сифатида рўйхатдан ўтишни билдиришганини инобатга олсак, келгуси йил фақат мазкур ҳамкорлик самараси ўлароқ балиқ етишириш чорак баробарга кўпайиши мумкин.

Темур ЭШБОЕВ,
(«Халқ сўзи»).