Самарқанд вилояти ҳокими Адиз Бобоев хитойлик инвесторлар — Ван Жанг Хуа ва Суи Тонг Ши билан учрашув ўтказди. Унда ҳудудда тиббиёт соҳасини ривожлантириш ва янги инвестиция лойиҳаларини амалга ошириш масалалари кўриб чиқилди.

Учрашувда инвесторлар Самарқандда қулоқ, бурун ва томоқ касалликларини даволашга ихтисослашган замонавий клиника ташкил этиш ниятида эканликларини маълум қилишди. Таъкидланишича, ушбу тиббиёт муассасасида илғор даволаш усуллари кенг қўлланилиб, хусусан, иглотерапия амалиётига алоҳида эътибор қаратилади.

Лойиҳани амалга ошириш учун 5 миллион АҚШ доллари миқдорида инвестиция киритиш режалаштирилмоқда. Учрашув якунида томонлар ушбу лойиҳани амалга ошириш юзасидан ҳамкорликда иш олиб боришга келишиб олдилар.

Шундан сўнг меҳмонлар Самарқанд давлат тиббиёт университетига ташриф буюрди. Бу ерда университет ректори, профессор Жасур Ризаев билан учрашув ташкил этилди. Унда томонлар ўртасида ўзаро манфаатли ҳамкорликни ривожлантириш истиқболлари ҳамда келгусидаги қўшма лойиҳалар юзасидан фикр алмашилди.

Учрашув давомида Хитой тиббиёт клиникаси вакиллари кўп йиллик тажрибалари, тиббиёт соҳасидаги ютуқлари ҳамда Хитойда қўлланилаётган энг замонавий ташхис ва даволаш усуллари билан ўртоқлашдилар. Шунингдек, Самарқанд давлат тиббиёт университети билан ҳамкорликда Самарқанд шаҳрида қулоқ, бурун ва томоқ касалликларига ихтисослашган замонавий клиника ташкил этиш бўйича фикр алмашдилар.

Абдулазиз ЙЎЛДОШЕВ, «Халқ сўзи».