Бир неча кундирки, халқ депутатлари Наманган шаҳар Кенгаши депутати ва ИИБ ходимлари ўртасидаги тортишув ижтимоий тармоқларнинг муҳокама мавзусига айланган. Гап шундаки, ўтган ҳафта депутат Толиб Муҳаммадиев вилоят марказидаги “Қизилкўприк” постида ИИБ катта инспектори талабларини бажармаслиги юзасидан улар ўртасида келишмовчилик юзага келган эди. ИИВнинг ахборот хизмати бўлими томонидан бу ҳусусда “Сафдор Ҳусанбой Зиёвиддинов депутатни тинчлантирмоқчи бўлганида у ходимнинг погони ва хизмат кўкрак нишонини юлиб олиб, бошқа томонга улоқтириб юборган", дея хабар берилган.

Бундай ҳолатларда депутат даҳлсизлиги талабларидан келиб чиққан ҳолда унга нисбатан жиноят иши қўзғатиш учун розилик беришни сўраб халқ депутатлари Кенгашига чиқилади. 16 апрель куни Наманган шаҳар прокуратураси махаллий Кенгашга ана шундай хат билан мурожаат қилган эди. Унда депутатга нисбатан Жиноят кодексининг 219-моддаси 2-қисми билан жиноят иши қўзғатиб, депутат Муҳаммадиев Толибга қамоқ эҳтиёт чораси кўрилиши учун розилик сўралган.

Бу орада тортишув гувоҳи бўлган депутат ҳамроҳининг Фейсбукда видеомурожаати тарқалди. Унинг айтишича, воқеа юз берган пайтда депутат ҳеч кимнинг погонини юлмаган, аксинча, ички ишлар ходимлари депутатнинг ҳақли талабларини бажармаган, ва ҳаттоки депутатга тарсаки туширганлиги баён қилинади.

Кеча халқ депутатлари Наманган шаҳар Кенгашининг сессиясида ушбу масала кўриб чиқилиб, тегишли қарор қабул қилинди. Унга кўра, Кенгаш депутатга нисбатан қамоқ эҳтиёт чораси қўллашга розилик беришни рад этган. Энди гап тегишли органларнинг воқеа тафсилотларини чуқур ўрганиб, унга ҳолис баҳо беришида қолди. “Ким ҳақу, ким ноҳақ”, деган саволга жавобни эса албатта, суд айтади.

Қудратилла НАЖМИДДИНОВ. “Халқ сўзи”.