Иллюстратив фото

“Катта еттилик” мамлакатлари (Буюк Британия, Германия, Италия, Канада, Франция, Япония ва АҚШ) Украинадаги можарода Россияни қўллаб-қувватлаётган учинчи давлат субъектларига қарши чоралар кўришда давом этади. Бу ҳақда ташкилотнинг онлайн саммити якунлари бўйича берилган баёнотда қайд этилди.

“Биз Россия урушини моддий жиҳатдан қўллаб-қувватловчи учинчи давлат субъектларига қарши чоралар кўришда давом этамиз, шу жумладан зарур ҳолларда учинчи мамлакатлардаги ташкилотларга нисбатан қўшимча чоралар кўриш орқали”, дейилади Италия раислигида ўтган “Катта еттилик” онлайн саммити коммюникесида.

“Катта еттилик”, шунингдек, молиявий институтларни Россия ҳарбий фаолиятини қўллаб-қувватлашдан тийилишга чақириб, бунинг олдини олиш учун чоралар кўриш ниятини эълон қилди.

“Биз Шимолий Кореянинг БМТ Хавфсизлик Кенгашининг тегишли резолюцияларини тўғридан-тўғри бузувчи Шимолий Корея баллистик ракеталарини экспорт қилиш ва Россия томонидан сотиб олинишини кескин қоралаймиз ва уларни бундай фаолиятни зудлик билан тўхтатишга чақирамиз.

Биз Эронни Россия армияси ва унинг ҳарбий кучларига ёрдам беришни тўхтатишга чақирамиз. Биз Хитой корхоналаридан Россияга қурол ва ҳарбий техника учун икки мақсадли материаллар ва бутловчи қисмлар етказиб берилаётганидан хавотир билдирамиз”, дейди “Катта еттилик” етакчилари.

КХДР Ғарб оммавий ахборот воситалари ва расмийларининг Россияга қурол-яроғ етказиб бергани ҳақидаги баёнотларини бир неча бор рад этган.

Шимолий Корея ташқи ишлар вазирлиги вакилининг таъкидлашича, мамлакат Россия билан ҳеч қачон қурол-яроғ бўйича шартнома тузмаган ва бу ҳақдаги ОАВнинг ҳар қандай хабари “бемаъни миш”дир.