Руслан Рустамовни анча йилдан буён биламан. У Қашқадарё вилоятидаги фаол ёшлардан бири. Айниқса, IT соҳасида ўтказилган турли танловлар, тадбирларда доим ўзининг фаоллиги, янги ғоялари, лойиҳалари билан ажралиб туради.

Руслан бундан бир неча йил аввал ўз корхонасини таъсис этиб, Қарши шаҳрида “таом етказиб бериш” хизматини йўлга қўйган эди. Тўғриси, унинг бу ташаббуси катта самара келтиришига унчалик ҳам ишонмаганман. Чунки ўша вақтда одамлар ҳали телефон ёки интернет орқали таом буюртма қилишга унчалик ҳам одатланмаган, бундай шароитда ишни изга тушириш жуда қийиндек туюлганди менга.

Бироқ ёш тадбиркор Руслан Рустамов чекинмади. У ўз лойиҳасини такомиллаштиришда, ривожлантиришда давом этди. IT соҳасини пухта ўзлаштиргани, бу борадаги малакаси, тажрибаси ҳам унга қўл келгани аниқ. Хуллас, орадан уч-тўрт йил ўтиб, Руслан Рустамов таъсис этган “Yemak” лойиҳаси вилоятдаги биринчи ва энг катта таом етказиш хизматига айланди.

— “Yemak” бу — кафе, чойхона, ресторан ва бошқа муассасалар билан бирга курьерларни боғловчи агрегатор ҳисобланади, — дейди Руслан Рустамов. — Бунда мижоз андроид учун мўлжалланган мобил иловамиз, телеграм учун мўлжалланган бот ёки сайтимизга кириб, менюдаги кафе ва ресторанлар ҳамда уларнинг таомномаси, нархлари билан танишади. Сўнг исталган таомни онлайн буюртма қилиши мумкин ва ушбу таом унга курьерларимиз томонидан белгиланган вақтда етказиб берилади. Айни вақтда фақат Қарши шаҳрида фаолият юритаяпмиз. Келгусида мамлакатимизнинг барча ҳудудларини қамраб олишни режалаштирганмиз.

Таъкидлаб ўтиш жоиз, 2023 йилнинг декабрь ойида Тошкент шаҳрида IT соҳасидаги нуфузли танловлардан бири — “President Tech Award” танловининг ғолиблари тақдирланди.

Эътиборли томони, танловда Руслан Рустамов раҳбарлигидаги “Yemak” лойиҳаси ҳам иштирок этиб, “тадбиркорлик ва молиявий технологиялар” йўналишида 1-ўринни қўлга киритиб, 100 минг АҚШ доллари миқдоридаги мукофотни қўлга киритди.

Жаҳонгир БОЙМУРОДОВ, “Халқ сўзи”.