Ўзбекистон элчихонаси ходимлари Италия парламентидаги “Италия-Марказий Осиё” гуруҳининг янги тайинланган аъзолари билан  учрашдилар.

Унда “Италия-Марказий Осиё” парламент гуруҳи раиси Фабрицио Бенсони, бош котиб Роберто Сорбелло, гуруҳ аъзолари Джанджакомо Каловини, Паоло Форментини, Фабио Петрелла, Пиеро Фассини, Этторе Розато ва  бошқа депутатлар қатнашдилар.

Фабрицио Бенсони бугунги кунда Италия ва Ўзбекистон ўртасидаги икки томонлама алоқалар жадал ривожланиб бораётганини таъкидлар экан, бу йўналишда парламентлараро ҳамкорлик янада фаоллашишига комил ишонч изҳор этди.

Ўзбекистон элчиси Отабек Акбаров ўз чиқишида Ўзбекистоннинг иқтисодий салоҳияти ва мамлакатимизнинг Италия билан ўзаро сиёсий, савдо-иқтисодий ҳамда маданий-гуманитар соҳалардаги ҳамкорлигидаги ҳозирги ҳолат ва унинг истиқболлари ҳақидаги фикрларини ўртоқлашди.

Шу билан бирга, депутатлар эътибори жорий йил
8-9 июнь кунлари Италияга амалга оширилган олий даражадаги ташриф доирасида Ўзбекистон Президенти Шавкат Мирзиёев ва Италия Бош вазири Жоржа  Мелони томонидан икки давлат ўртасида стратегик шериклик алоқаларини ўрнатиш бўйича қабул қилинган декларацияга қаратилди.

“Ушбу ҳужжатнинг Ғарбий Европа давлатлари орасидан биринчи бўлиб айнан Италия билан имзоланиши ҳар икки мамлакат учун муҳим аҳамият касб этади”, деди Ўзбекистон элчиси.

Дипломат таълим соҳасидаги икки томонлама алоқаларга ҳам тўхталар экан, Турин политехника университети ва Пиза университетининг Тошкентда мувафаққиятли фаолият юритаётганини таъкидлади. Шунингдек, Кампаниа Луижи Ванвителли университетининг Бухорода кампуси очилиши режалаштирилаётгани ҳам маълум қилинди. 

Учрашув якунида жорий йил сентябрь ойида Ўзбекистон Олий Мажлиси палаталарида ташкил этилган Италия билан ҳамкорлик ва дўстлик гуруҳлари ҳамда “Италия-Марказий Осиё” гуруҳи ўртасида видеоконференция алоқаси воситасида учрашув ташкил этишга келишиб олинди.