Ўзбекистон қишлоқ хўжалиги вазири Иброҳим Абдураҳмонов Италиянинг «Bonifiche Ferraresi Group» компанияси молия ва инвестициялар раҳбари Стефания Квинтавалле билан учрашди.

Мулоқот чоғида мамлакатимизда илғор технологиялар асосида қишлоқ хўжалиги экинларини етиштириш, маҳсулотларни қайта ишлаш ва Италия бозорига экспорт қилиш ҳамда тўғридан-тўғри инвестиция киритиш имкониятлари муҳокама қилинди.

Италия томони Ўзбекистон Европа Иттифоқининг GSP+ тизими бенефициари эканлиги туфайли қишлоқ хўжалиги маҳсулотлари экспортида божхона имтиёзига эгалигига алоҳида эътибор қаратди. Бундан ташқари, компания мутахассисларининг Ўзбекистон ёш фермерлари малакасини оширишга тайёрлиги маълум қилинди.

Учрашув якунида «Bonifiche Ferraresi Group» вакилларидан иборат техник гуруҳнинг Ўзбекистонга ишчи сафарини ташкил этиш ва мамлакатимизда компания фаолиятини йўлга қўйиш имкониятларини муҳокама қилишга келишиб олинди.

«Bonifiche Ferraresi Group» Италия шимолида жойлашган энг йирик қишлоқ хўжалиги компанияси саналади. Компания 8000 гектар ер майдонида қишлоқ хўжалиги маҳсулотларини етиштиради. У буғдой, шоли, мева-сабзавот ва бошқа экинлар етиштириш ҳамда қайта ишлашга ихтисослашган. Таркибида 20 га яқин тармоқ корхоналари мавжуд бўлган компаниянинг йиллик даромади 300 миллион еврога тенг.