Сешанба куни Италия Бош вазири Жузеппе Конте ҳукумат карантин режимини сезиларли даражада енгиллаштириш режаси устида иш олиб бораётганини айтди. Унга кўра, чеклов чоралари 4 май куни тугайди. Бу ҳақда Италиянинг ANSA ахборот агентлигига хабар берди.

“Умид қиламанки, шу ҳафта охирида сизга ушбу режа ҳақида маълумот бераман ва дастур тафсилотларини тақдим этаман”, — деди Конте ўзининг “Facebook”даги саҳифасида.

Бош вазирнинг сўзларига кўра, мамлакат фуқароларининг аксарияти карантиндан чарчаган ва чекловлар камайишини ёки ҳатто олиб ташланишини хоҳлашади.

“Бунинг учун чакана савдо компаниялари ва муассасалари имкон қадар тезроқ ишлашни бошлаши керак. Мен ҳам “ҳаммасини бирдан очамиз” дегим келади. Бирдан. Аммо бу масъулиятсизлик бўлар эди. Бу вируснинг янада кенг тарқалишига олиб келади. Шундай қилиб, бу бизнинг шу пайтгача қилган ишларимизнинг натижасини бир пул қилиши мумкин”, — деди Бош вазир.

Конте шунингдек, минтақавий хусусиятларни ҳисобга олган ҳолда миллий режа ишлаб чиқилишини айтди.

Эслатиб ўтамиз, март ойи бошида расмийлар мамлакатда карантин жорий этганди. Чеклов чоралари 4 апрелга белгиланган эди, аммо карантин чоралари ҳали ҳам давом этмоқда.

Сўнгги маълумотларга кўра, Италия коронавирус инфекцияси бўйича дунёда учинчи ўринда туради. Мамлакатда 181 22 киши вирусни юқтирган, шундан 24 144 киши вафот этган ва 48 877 киши даволаниб чиққан.

ANSA ахборот агентлигининг хабар беришича, Италияда 141 нафар шифокор коронавирусдан кўз юмган.