Истанбулдаги терактда гумон қилинган 17 кишини ҳибсга олинди
Фото: Reuters
Туркия суди Истанбулнинг Истиқлол кўчасида теракт тайёрлашда гумон қилинган 17 кишини ҳибсга олди.
Туркия суди 13 ноябрь куни Истанбулнинг Истиқлол кўчасида содир этилган ҳужумга алоқадорликда гумонланган 17 нафар гумонланувчини ҳибсга олди. Бу ҳақда "Associated Press" агентлиги хабар бермоқда.
Агентлик маълумотларига кўра, қўлга олинганлар давлат бирлиги ва яхлитлигини бузиш, қасддан одам ўлдириш ва суиқасдда айбланмоқда. Суд шунингдек, ҳужумга алоқадорликда айбланиб полиция томонидан ҳибсга олинган 29 кишини Туркиядан депортация қилишга қарор қилди.
Аввалроқ, Туркия ички ишлар вазири Сулаймон Сойлу Истанбул марказида теракт уюштириш буйруғи Сурия шимолидаги Манбиж шаҳридан олинганини маълум қилган эди. Вазир, шунингдек, жорий йилда 18 та худкушлик ҳужумининг олди олинганини айтди.
Жорий йилнинг 13 ноябрь куни Истанбулнинг Истиқлол кўчасида кучли портлаш содир бўлиб, 6 киши ҳалок бўлди, 80 дан ортиқ киши жароҳатланди. Теракт содир этишда гумон қилинаётган Сурия фуқароси Аҳлам Албашир сўроқ пайтида Курдистон ишчилар партиясига алоқадорлигини тан олган.
Изоҳлар
Ҳозирча ҳеч ким фикр билдирмаган. Балки Сиз биринчилардан бўларсиз?
Изоҳ қолдириш учун тизимга киринг