Фото: “Халқ сўзи”

Япония халқаро университетида таҳсил олиб, Андижонга қайтганимда кўпчилик : “Энди нима иш қиласан?» деб савол беришган. “Ҳеч бўлмаганда таржимонлик қиларман...» десам яна ҳайратланишган: “Андижон сайёҳлик маркази эмаску, қанақасига таржимонлик қиласан?»

Президентимиз ташаббуси билан кейинги йилларда ёшларга бўлган эътибордан унумли фойдаланган ҳолда Андижон шаҳрида “Sakura-Андижон” номли нодавлат таълим муассасасини барпо этдим. Ҳозирга келиб бу ерда ҳамюртларимиз япон, корейс, рус ва инглиз тилларини мукаммал ўрганишмоқда.

Хусусий секторга бўлган ишонч ва эътибор яхшилангач, “Reiwa” хусусий бандлик агентлигини ташкил этиб, Японияда ишлашни хоҳлаган замондошларимиз бандлигини таъминлашга кўмаклашиб келмоқдаман. 30 дан ортиқ хорижий ҳамкорларимиз туфайли замондошларимизнинг ишончини оқлашга улгурдик. Ўтган қисқа даврда мамлакатимиз бўйлаб юзлаб йигит-қизларни Японияда қурилиш ва от спорти йўналишларида меҳнат қилишларига имконият яратдик.

Бугун юртимизга хорижлик ишбилармонларнинг қизиқиши баланд. Вилоятимизга ҳам кўплаб хорижий давлатлар, жумладан, Япониядан ҳамкорларнинг ташриф буюриши таржимонларга бўлган эҳтиёжни янада оширмоқда. Бундай имконият ўқув муассасамизда таҳсил олган йигит-қизлар учун имконият эшикларини очяпти.

Бундан буён биз ёшлар “Ўқидим, мутахассис бўлдим, энди нима иш қилай?» дея кимнингдир эътиборига кўз тикмай, ташаббускорлигимизни амалда исботлаб, ўзимиз иш ўрни яратишимиз лозим. Бу давлатимиз раҳбарининг биз ёшларга бўлган эътиборининг юксак самараси бўлади.

Бекзодбек ҲАМРОҚУЛОВ,

Андижон шаҳридаги “Sakura-Андижон” нодавлат таълим муассасаси ва “Reiwa” хусусий бандлик агентлиги раҳбари.