Фото: www.google.com

Қироллик — инсондан жуда катта масъулиятни талаб қилувчи тушунча. Баъзан ушбу масъулият катта ёшли инсон эмас, болаларнинг елкасига юклатилиши ҳам мумкин.

Қироллик ва подшолик нуфузи бугунги кунга қадар сақланиб қолганидан хабардорсиз. Дунёда шундай мамлакатлар борки, бу ердаги ҳокимият ҳамон авлоддан авлодга ўтиб келади. Баъзан қироллар тахтга жуда эрта чиқишга мажбур бўлади.

Уганданинг Торо қироллигини бошқариб келаётган ва бугунги куннинг энг ёш қироли ҳисобланган Ойо Нуимба Кабамба Игуру Рукиди IV айнан шундай инсонлардан бири. Торо қироли Ойо 1992 йил 16 апрелда туғилган.

24 ёшида қирол Ойо дунёдаги энг ёш бошқарувчи монарх бўлди. Бу вақтга келиб қирол Ойо ҳокимиятнинг қонун-қоидаларини яхшигина тушуниб олди. У тахтга чиққан вақтлари 3 ёшда эди. Митти қирол учун жуда кичик тахт ясалган, қирол улғайгани сайин тахт ўлчамларини ҳам ўзгартириб боришган. Қирол учун маросимлар қоидаси ҳам ўзгартирилган. Қасамёдлар вақтида унга ўйинчоқларга овуниб ўтиришга рухсат берилган. Аввалига ҳукумат ишлари вазирлар ҳамда она қиролича қўлида бўлган. Кейинчалик Ойо улғайиб, Менежмент ва бизнес соҳасида таҳсил олди, ўзининг қироллик мажбуриятларини тўлақонли равишда бажаришга ҳам киришди.

Бугунги кунда унинг фуқаролари қиролга жуда яхши таъриф берадилар: у солиқлар борасида ўта адолатли, гуманитар-ижтимоий лойиҳалар учун катта пул ажратади, соғлиқни сақлаш масаласи ҳақида қайғуради ва фуқароларининг ҳаётини яхшилаш учун тинмай курашади.