Ички бозорга янги турдаги маъданли сув тақдим этилди
Пискент туманининг «Дўстлик» МФЙ ҳудудида тадбиркор Жамшид Ачилов раҳбарлигидаги "WOODLANDS" МЧЖ маъданли сув қадоқлаш корхонаси иш бошлади. Ушбу лойиҳа 1 миллиард 250 миллион сўм сармоя киритиш эвазига амалга оширилди.
—170 метр чуқурликдан олинаётган зилол сув уч босқичда тозаланиб, истеъмол учун фойдали минераллар билан бойитилмоқда, — дейди корхона иш юритувчиси Сарвар Тошниёзов. —Ҳозир бу ерда кунига 14 минг дона минерал сув қадоқланмоқда.
Қишлоқ жойларида тадбиркорликни ривожлантириш ва аҳолини иш билан таъминлаш мақсадида туман ҳокимлиги томонидан ноль қийматда ажратилган ушбу бино-иншоотда «Дўстлик» қишлоғида истиқомат қилаётган 8 нафар ёшлар иш билан таъминланди.
"WOODLANDS" корхонаси яқинда тўлиқ қувват билан ишга туширилгач, маҳсулот ишлаб чиқариш ҳажми икки баробарга кўпайиб, янги иш ўринлари сони яна 10 тага ортади.
Шодиёр МУТАҲАРОВ,
(«Халқ сўзи»).
Изоҳлар
Ҳозирча ҳеч ким фикр билдирмаган. Балки Сиз биринчилардан бўларсиз?
Изоҳ қолдириш учун тизимга киринг