Фото: Халқ сўзи

Қўлдаги ҳунар ортидан элни, юртни яшнатишга не етсин. Қўлидан иш келмайдиган, “Иш йўқ”, “Шароит йўқ” деб нолиб юрганлардан асрасин. Астойдил интилган, иштиёқи бор киши, албатта, бир ҳунар эгаси бўлади, буни мен ўз ҳаётий тажрибам давомида кўриб, билиб, гувоҳи бўлиб келяпман. Айниқса, аёл кишининг қўлидан иш келмаслиги – бу фожеа. Ахир бурунги замонларда ҳам аёлларимиз жуда тадбиркор, ҳунарманд бўлишган. Гиламдўзлик, зардўзлик, дўппидўзлик, қўйингки, улар қўлидан келмаган иш бўлмаган.

Бугун мен яккабоғлик ишсиз ва ҳунарсиз аёлларни тўплаб, уларни касбга йўналтиришга ҳаракат қиляпман. 2010 йилда ўзим асос солган “Сетора имкон плюс” нодавлат таълим муассасасида опа-сингилларимиз 18 турдаги ҳунар сир-асрорларини ўрганмоқда. Ҳар йили 800 нафарга яқин хотин-қиз муассасамиздаги 3 ойлик ўқув курсларида таҳсил олиб, бир ҳунар эгаси бўлиб чиқмоқда. Муассасамиз фаолиятини кенгайтириб, Чироқчи ва Қамаши туманларида ҳам филиаларимизни очдик. Мени қувонтирган бир жиҳат шуки, аёлларимизда ҳунар эгаллашга иштиёқ кучли. Ҳунарли бўлганлари эса ҳаётда ўз ўрнини топиб кетмоқда.

Бир воқеа ҳеч ёдимдан чиқмайди. Бир куни Яккабоғ туманидаги қишлоқлардан бирида яшовчи тадбиркор уйига таклиф қилди. Уй-жойининг ҳашаматидан кўз қамашади. Уйдан бир аёл чиқиб, мени бағрига босди ва кўзлари намланди. Мен нима бўлаётганидан англамай турганимда у:

— Наргиза опа, мени танимадингизми, ахир мен Муаззамман, бундан 5 йил олдин ишсиз, ҳунарсиз бир аёл эдим. Сизнинг қўлингизда ҳунар ўрганиб, мана, катта тадбиркор бўлдим, ишлаб чиқараётган маҳсулотларимиз бутун Ўзбекистон бўйича тарқатилмоқда. “Ҳунари борнинг бахти бор”, деб кўп такрорлар эдингиз, буни мен ўз ҳаётим мисолида кўрдим, — деди.

Мен 12 йиллик фаолиятим давомида ҳунарли бўлиб, ҳаётда ўз ўрнини топиб кетган кўплаб хотин-қизлар билан учрашаман ва кўксим фахру ғурурга тўлади. Ахир жонажон юртимизда тадбиркорлар учун кенг имконият ва имтиёзлар яратиб берилгани, ўз бизнесини ривожлантириш ва эркин фаолият юритиши кафолатлаб қўйилгани бугун уларга қўл келмоқда.

Буларнинг бари пировардида Мустақиллигимизнинг улуғ неъмат эканидан далолат бермоқда. Бу йил Ватанимизнинг қутлуғ 31 йиллик тўйини кенг тантана қиламиз. Улуғ санани шоду хуррамлик билан кутиб олар эканмиз, кўп қаторида шу гўзал ва бетакрор юрт тараққиёти, равнақи учун хизмат қилишни ўзимнинг муқаддас бурчим деб ҳисоблайман.

Наргиза Саломова,

Яккабоғ туманидаги “Сетора имкон плюс” нодавлат таълим муассасаси раҳбари,

Қашқадарё вилояти.