Ҳиндистонда кислород етишмаслиги сабабли бир неча соат ичида коронавирусга чалинган ўнлаб беморлар вафот этган — ОАВ
Жума куни кечқурун Деҳлидаги касалхоналардан бирида тиббий кислород етишмаслиги сабабли коронавирус инфекциясига чалинган камида 25 нафар бемор вафот этган. Бу ҳақда Ҳиндистоннинг "NDTV“ телеканали ушбу воқеа юз берган ”Jaipur Golden Hospital" шифохонаси бош шифокорига таяниб хабар бермоқда.
Бош шифокор Д. К. Балужанинг айтишича, касалхона кутилганидек кечки 17:00 да эмас, балки ярим тунда зарур бўлган кислородни қабул қилинган ва ўша вақтга қадар 25 нафар бемор вафот этиб бўлган.
Шифокорнинг сўзларига кўра, шифохонада 200 дан ортиқ одам оғир аҳволда ва кислород билан таъминланиш деярли тугаган.
Ўтган кун давомида Ҳиндистонда 346 минг нафардан ортиқ одамда инфекция аниқланди. Бу мамлакатда пандемия бошидан бери қайд этилган рекорд кўрсаткич ҳисобланади.
Ҳозирда Ҳиндистон коронавирус билан касалланганлар сони бўйича дунёда иккинчи ўринда бормоқда. Пандемия бошланганидан бери мамлакатда 16,6 миллиондан ортиқ инфекцияни юқтирганлар қайд этилган. 189,5 минг нафар бемор коронавирус асоратлари туфайли ҳаётдан кўз юмган.
Изоҳлар
Ҳозирча ҳеч ким фикр билдирмаган. Балки Сиз биринчилардан бўларсиз?
Изоҳ қолдириш учун тизимга киринг