Фото: Reuters

Бундестаг сайловларида Ангела Меркелнинг коалициясини мағлуб этиб, ғалаба қозонган Германия социал-демократик партияси ҳафта охиригача «Яшиллар» ва Эркин демократик партияси билан уч томонлама ҳукумат тузишни режалаштирмоқда.

Социал-демократик партияси парламентдаги фракцияси етакчиси Рольф Мютзених уч томонлама коалициянинг бўлажак шериклари билан учрашишга тайёрлигини билдирди. «Яшиллар» ва Эркин демократик партияни дастлабки музокараларга эътибор қаратишга чақирди.

Германия канцлерлигига асосий номзод Олаф Штольц уч партия коалиция тузишига умид билдирди. Шу тариқа сўнгги йилларда Ангела Меркелнинг Христиан-демократик иттифоқи ва Христиан социал иттифоқи (ХДИ/ХСИ) блоки мамлакат ҳукуматида вакиллик қилмайди.

26 сентябрь куни Бундестагга бўлиб ўтган сайловларда Ангела Меркел партияси 24,1 фоиз овоз тўплаб, ўз тарихидаги энг ёмон натижани кўрсатди. Германия социал-демократик партияси 25,7, «Иттифоқ-90 / Яшиллар» 14,8, Эркин демократик партияси 11,5, «Германия учун муқобил» ўнг қанотли популисти 10,3 овозни қўлга киритди.

Сайловдан кейин Германия аҳолисининг аксарияти ХДИ/ХСИ блоки етакчиси Армин Лашетнинг истеъфосини талаб қилиб чиқишди.