Германиянинг Дрезден шаҳрида Европанинг энг йирик "Яшил Гумбаз" номли қадимий заргарлик буюмлари коллекциясидан миллиард евро қийматидаги заргарлик буюмларини ўғирлашда гумон қилинаётган шахслар қўлга олинди.

Бу ҳақда “Daily Mail” хабар берди.

Саксония федерал штати полициясининг твиттеридаги микроблогида маълум қилинишича, Берлинда 18 та объект, жумладан, 10 та квартира, шунингдек, гаражлар ва автомобилларда тинтувлар ўтказилган махсус операцияда 1600 дан ортиқ полициячилар қатнашган.

Полиция бутун Берлин бўйлаб квартираларни тинтув қилган ва "Яшил Гумбаз"ни талон-тарож қилишда гумон қилинаётган уч кишини ҳибсга олган. Маълум қилинишича, ҳибсга олинганларнинг барчаси Германия фуқаролари.

Ҳуқуқни муҳофаза қилиш идораларининг қайд этишича, операциянинг мақсади гумонланувчиларни ҳибсга олишдан ташқари, "ўғирланган санъат асарларини" топишдан иборат.

Маълум қилинишича, гумондорлар томонидан олмослар билан ишланган ХVI асрга тегишли қилич, қиймати тахминан 11 миллион долларни ташкил этувчи 49 каратли Дрезден оқ олмоси ҳамда ХVIII асрга оид Саксония ҳукмдори томонидан буюртма қилинган заргарлик буюмлари ўғирланган.

Ушбу заргарлик буюмларини қидириш ишлари давом этмоқда. Айни пайтда квартира, гараж ҳамда транспорт воситаларида қидирув ишлари олиб борилмоқда. Шунингдек, полиция мумкин бўлган далиллар - рақамли ахборот воситалари, кийим-кечак ва асбобларни ҳам қидирмоқда.