Иллюстратив фото

Германия Россия нефтига эмбарго қўйиш тарафдори. Бироқ етказиб беришни тўхтатишга тайёргарлик кўриш учун бир неча ой керак бўлади. Бу ҳақда Германия канцлерининг иқтисодий масалалар бўйича ёрдамчиси Йорг Кукис «The Financial Times» нашрига берган интервьюсида айтиб ўтди.

«Биз Россиядан нефть сотиб олишни тўхтатмоқчимиз. Аммо мамлакат учун нефть таъминотининг бошқа манбаларини таъминлашга ишонч ҳосил қилиш учун бизга бироз вақт керак», дейди Кукис.

Унинг таъкидлашича, Германия Россиянинг «Роснефт» ширкати назорати остидаги Шведт шаҳридаги нефтни қайта ишлаш заводига Болтиқ денгизи орқали танкерлар билан бошқа жойлардан хомашё олиб келиш устида ишламоқда. Бунинг учун Берлин Ростокдаги портни такомиллаштириши ва у ердан Шведтгагача қувур тортиши керак бўлади.

Кукиснинг айтишича,  Германия қатор нефть компаниялари, Еврокомиссия ва Польша ҳукумати билан музокаралар олиб бормоқда.

Бироз аввал Германия иқтисодиёт вазири, вице-канцлер Роберт Хабек унинг мамлакати Россия нефти импортини қисқартиргани ва мазкур давлат энергия манбаларига тобеликдан холос бўлишга яна бир қадам яқинлашганини айтган эди. Хабекнинг сўзларига кўра, бир неча ҳафта олдин Россиядан энергия манбаларини узиб қўйиш вазифаси қийин бўлиб туюлган. Аммо энди бу муаммо эмас.

Маълум қилинишича, Жорий йилнинг 24 февралига қадар Германия жами сотиб оладиган нефтнинг 35 фоизини Россиядан импорт қилган. Ўтган саккиз ҳафта ичида бу кўрсаткич 12 фоизга камайган.

Олдинроқ Германия саноат иттифоқи раҳбари Зигфрид Русвурм Европа саноати яқин бир неча йил ичида энергия нархининг юқорилиги ва логистика қийинчиликлари туфайли жиддий иқтисодий йўқотишларни бошдан кечиришини айтган эди.