2025 йил 1 июль куни «Fitch Rating» халқаро рейтинг агентлиги томонидан «Иссиқлик электр станциялари» акциядорлик жамиятининг халқаро кредит рейтинги «BB-» дан «BB» даражасига оширилди. Рейтингга берилган прогноз эса «барқарор» даражасида сақланди.

Бу ўсиш 2018 йилдан бери қайд этилган биринчи рейтинг яхшиланиши ҳисобланади. Хусусан, агентликнинг ҳисоботида қайд этилишича, «Иссиқлик электр станциялари» АЖ иқтисодий барқарорликни сақлаш, молиявий шаффофликни таъминлаш ва корпоратив бошқарувни такомиллаштириш борасида салмоқли ютуқларга эришган.

Эслатиб ўтамиз, жорий йилнинг 26 июнь куни «Fitch Rating» халқаро рейтинг агентлиги Ўзбекистон Республикасининг суверен кредит рейтингини ҳам «BB-»дан «BB» даражасига оширган ва прогнозни «барқарор» деб баҳолаган эди. Мазкур баҳолаш орқали «Иссиқлик электр станциялари» АЖнинг рейтинги мамлакатнинг умумий кредит қобилияти билан бир хил даражага чиқди.

Янги рейтинг баҳоси «Иссиқлик электр станциялари» АЖнинг жаҳон инвестиция бозорларидаги нуфузини янада мустаҳкамлаб, компаниянинг аниқ бизнес стратегияси, шаффоф молиявий ҳисоботлари ва самарали корпоратив бошқарув тизимига эга эканини тасдиқлади.