Фото: “Халқ сўзи”

“Йил аёли” миллий танловининг вилоят босқичида фаол қатнашган ва ғолиб бўлган иштирокчилар муносиб тақдирланди.

Тошкент ахборот технологиялари институти Фарғона филиалида бўлиб ўтган тадбирда 19 та шаҳар-туман босқичларида қарийб минг нафар қатнашчилар ўртасида ғолиб бўлган 156 нафар иқтидорли аёл ўзаро баҳс олиш боришди.

— Бу танлов жамиятимизда хотин-қизлар фаоллигини ошириш ва уларни муносиб рағбатлантириш мақсадида ташкил этиб келинмоқда,—дейди Фарғона вилояти ҳокими ўринбосари – вилоят оила ва хотин-қизлар бошқармаси бошлиғи Комила Кавлонова. —Бугун ҳам ҳакамлар ҳайъати ва экспертлар хулосалари асосида “Йилнинг энг ватанпарвар аёли”, “Йилнинг энг фаол олима аёли”, “Йилнинг энг илғор тадбиркор аёли”, “Йилнинг энг жонкуяр устози”, “Йилнинг энг яхши уй бекаси”, “Йилнинг энг соғлом турмуш тарғиботчиси” каби 11 та номинация бўйича энг кучлилар саралаб олинди. Шу тариқа ғолиблар энди танловнинг республика босқичида вилоятимиз шарафини ҳимоя қилишади.

Таъкидлаш ўринли, танлов низомига кўра якуний босқичда олий ўринни эгаллаган иштирокчи Президент совғаси — автомобиль билан тақдирланади. Шунингдек, фахрли биринчи, иккинчи ва учинчи ўрин соҳиблари ҳам пул мукофотлари берилади.

Ботир МАДИЁРОВ, “Халқ сўзи”.