Фото: «Халқ сўзи»

Фарғона вилоятида «Ўзбекистон – ёшлар мамлакати» шиори остида навқирон авлод вакиллари сайли ҳамда гала-концерт ўтказилди.

Тадбирда пойтахтдан ташриф буюрган бир гуруҳ таниқли санъат ва маданият арбоблари, таълим, илм-фан намояндалари сўзга чиқиб, мамлакатимиз Конституциясига киритилаётган янгиликлар, янгиланаётган Бош қомусимизнинг мазмун-моҳияти хусусида батафсил маълумот беришди.

— Бугунги мулоқот фарғоналик ёшлар муҳим сиёсий жараёнга асло бефарқ эмасликларини кўрсатди, — дейди актёр Расулхон Қодирхонов. — Шу учун ҳам тарғибот тадбири самимий, дўстона кайфиятда ўтмоқда. Йигит-қизлар ўз тақдири, келажаги билан боғлиқ янгилик ва ўзгаришлар жараёнида ҳаётнинг жўшқин оқимидан четда эмасликлари нақадар қувонарлидир.

Ёшлар сайли давомида таниқли санъаткорлар, эстрада хонандаларининг чиқишлари, мушакбозлик барчага унутилмас таассуротларни туҳфа этди.

— Конституция лойиҳасида таълимнинг барча жараёнлари, хусусан, хотин-қизларнинг магистратура босқичида ўқиши, илмий фаолияти ҳар жиҳатдан қўллаб-қувватланиши қонунан мустаҳкамлаб қўйилаётгани бизни беҳад мамнун этди, — дейди Фарғона давлат университети докторанти, ёш олима, «Келажак бунёдкори» мукофоти соҳибаси Зарнигор Убайдуллаева. — Шу боис, 30 апрель куни ўтказиладиган референдумда барча ёшлари қатори фаол қатнашишни мақсад қилганман.

Ботир Мадиёров, «Халқ сўзи».