Фото: Халқ сўзи

Фарғонада “Fergana Fermer Expo Uzbekistan – 2022» кўргазмаси бўлиб ўтмоқда. Туркиялик тадбиркорлар иштирокида ўтказилаётган кўргазмада қишлоқ хўжалиги, чорвачилик ва доривор ўсимликлар бўйича халқаро ҳамкорлик кўламини кенгайтириш, инвестициявий тижорат таклифларини кўриб чиқиш режалаштирилган.

Қишлоқ хўжалиги вазирлиги, Фарғона вилояти ҳокимлиги, вилоят Агрохизматлар маркази ҳамда Туркиянинг Селчук университети ҳамкорлигида ташкил этилган тадбирда икки мамлакатнинг қишлоқ хўжалиги, чорвачилик соҳаси масъуллари ва мутахассислари, олимлар, тадбиркорлар иштирок этмоқда.

— Кейинги йилларда соҳада олиб борилаётган кенг қамровли ислоҳотлар самараси сифатида вилоятимизда қишлоқ хўжалиги тармоқларига илм-фан ютуқларини, инновацион лойиҳаларни татбиқ этишга катта эътибор қаратилмоқда, - дейди Фарғона вилояти ҳокимининг қишлоқ ва сув хўжалиги масалалари бўйича ўринбосари Алибек Турсунов. — Айни жараёнда Ўзбекистон ва Туркия муносабатлари ривожланиб бораётгани қувонарлидир. Шу йилнинг февраль ойида Фарғона вилояти ҳокими Хайрулло Бозоров бошчилигидаги вилоят делегациясининг Туркияга амалий ташрифи натижасида ҳам бир қатор амалий келишувларга эришилди.

Кўргазманинг очилиш маросимида сўзга чиққан Туркиянинг Бурдур вилояти қишлоқ хўжалиги бошқармаси бошлиғи Меҳмет Туғруль икки давлат қишлоқ хўжалиги вакилларининг бу каби ўзаро тажриба алмашишлари айни муддао эканини таъкидлаб ўтди.

— Икки кун давом этадиган кўргазмада Туркиянинг 16 та компанияси ва 30 нафарга яқин қишлоқ хўжалиги йўналишида фаолият олиб бораётган тадбиркорлари иштирок этиши ҳамда янги шартнома ва келишувларга эришиш кўзда тутилган, - дейди Фарғона вилояти Агрохизматлар маркази раҳбари, қишлоқ хўжалиги фанлари доктори Насибжон Ўразматов. — Бу борада эришиладиган келишувлар вилоятимизда қишлоқ хўжалиги замонавий мезонлар асосида жадал ривожланишига хизмат қилади.

Тадбир доирасида чорвачилик, боғдорчилик, пахтачилик, уруғчилик, қишлоқ хўжалиги техникалари каби тармоқларда фаолият олиб бораётган туркиялик тадбиркорларнинг кўргазмалари ташкил этилади. Шунингдек, пахта етиштириш, пахта тозалаш саноати, чорвачиликни ривожлантиришда халқаро тажрибалар ҳамда янги технологияларни жорий қилишнинг аҳамияти мавзусида сессиялар ўтказиш режалаштирилган.

Кўргазма эртага, 15 декабрь куни ҳам ўз ишини давом эттиради.

Ботир Мадиёров, «Халқ сўзи».