Ботир МАДИЁРОВ/«Халқ сўзи». Футбол бўйича У-17 ёш тоифасидаги Осиё кубогида мамлакатимиз терма жамоаси чемпион бўлгани ҳамюртларимизни беҳад қувонтирди. Бу юртимизда «миллионлар ўйини» нечоғли қадрланиши, ўз навбатида, ўзбек футболи янги босқичга чиқаётганидан далолат беради.

Фарғона шаҳридаги муҳташам «Само» спорт мажмуасида Ўзбекистон У-17 жамоаси бош мураббийи Ислом Исмоилов ҳамда жамоа футболчилари Асилбек Алиев ва Жамшидбек Рустамов иштирокида ўтказилган тантанали тадбирда ютуқлар алоҳида эътироф этилди.

Терма жамоа аъзоларини қутлашга бағишланган тадбирда Фарғона вилояти ҳокимлиги мутасаддилари, масъул ташкилот ва идоралар раҳбарлари, кенг жамоатчилик вакиллари ҳамда ёшлар қатнашди.

Айтиш жоиз, терма жамоамизнинг тарихий ғалабасига фарғоналик футболчилар ҳам муносиб ҳисса қўшишди. Хусусан, Бувайда туманининг Манғит қишлоғида вояга етган Асилбек Алиев 5 та гол уриб, мусобақанинг энг яхши тўпурари бўлди. Олтиариқ туманининг олис Катпут қишлоғида туғилиб ўсган Жамшидбек Рустамов ўз ҳисобига 3 та гол ёздириб қўйди.

— Давлатимиз раҳбари, халқимизнинг юксак эътибори ва рағбатидан чексиз миннатдормиз, — дейди Ўзбекистон У-17 жамоаси аъзоси, «Келажак бунёдкори» медали совриндори Асилбек Алиев. — Айни пайтда асосий мақсадимиз жорий йилнинг кузида бўлиб ўтган жаҳон чемпионатида ҳам муносиб иштирок этиш ва ўзбек футболи мухлисларини хурсанд қилишга қаратилган.