Фахрийлар ҳамда устоз-журналистлар шарафланди
Бугун узоқ йиллар Ўзбекистон Миллий телерадиокомпаниясида фаолият юритиб, ҳозирда кексалик гаштини сураётган фахрийлар ҳамда компанияда самарали ишлаб келаётган устоз-журналистлар шарафланди, деб хабар бермоқда Президент матбуот котиби Шерзод Асадов.
«Тадбирда қатнашиб, фидокорона меҳнати, профессионал маҳорати ва серқирра ижоди билан юртимизда телевидение ва радио соҳасининг ривожига хизмат қилган қадрли устозларимиз ва фахрийларимизга, нафақат телеэкранларда, балки кадр ортида хизмат қиладиган ҳамкасбларимизга ҳам Президентимиз Шавкат Мирзиёевнинг самимий саломи ва энг эзгу тилакларини етказдим», дейди Асадов.
У шунингдек, телевидение ва радио дарғаларини ардоқлаш, ҳаёт йўлларини ёшларга ибрат қилиб кўрсатиш, устоз-шогирд анъаналарини, авлодлар ўртасидаги ришталарни мустаҳкамлашда бундай учрашувларнинг аҳамияти беқиёс эканини алоҳида таъкидлади.
«Ушбу эзгу ташаббус учун Абдурашид Жўрабоев бошчилигидаги Миллий телерадиокомпаниянинг катта жамоасига миннатдорлик билдираман», деб ёзди Президент матбуот котиби.
Изоҳлар
Ҳозирча ҳеч ким фикр билдирмаган. Балки Сиз биринчилардан бўларсиз?
Изоҳ қолдириш учун тизимга киринг