Эрон ташқи ишлар вазири АҚШ билан тўғридан-тўғри алоқалар қайта тикланганини рад этди
Эрон Ташқи ишлар вазири Аббос Ароқчи АҚШ президентининг махсус вакили Стив Уиткофф билан тўғридан-тўғри алоқаларни давом эттираётгани ҳақидаги хабарларни инкор этди. У бу ҳақда ўзининг X (собиқ Twitter) ижтимоий тармоғидаги саҳифасида пост қолдирди.
Бундан аввал Axios портали Ароқчи Уиткоффга ҳарбий низони тўхтатиш ҳақида матнли хабарлар йўллагани ҳақида хабар берган эди.
«Жаноб Уиткофф билан менинг охирги алоқам унинг иш берувчиси Эронга қарши навбатдаги ноқонуний ҳарбий ҳужум уюштириб, дипломатияни йўқ қилишга қарор қилишидан олдин бўлган. Бунинг аксини даъво қилувчи ҳар қандай баёнотлар, афтидан, фақатгина нефть трейдерлари ва жамоатчиликни чалғитишга қаратилган», — деб ёзди Эрон ТИВ раҳбари.
Эслатиб ўтамиз, аввалроқ АҚШ Президенти Дональд Трамп Теҳрон Вашингтон билан боғланганини, бироқ бунда иштирок этаётган эронлик мулозимлар келишув тузиш ваколатига эга ёки эмаслиги номаълумлигини айтган эди.
Изоҳлар
Ҳозирча ҳеч ким фикр билдирмаган. Балки Сиз биринчилардан бўларсиз?
Изоҳ қолдириш учун тизимга киринг