Эрон Ҳўрмуз бўғозини ўт очишни тўхтатиш даври тугагунга қадар барча тижорат кемалари учун очди. Бу ҳақда Ислом Республикаси Ташқи ишлар вазири Аббос Ароқчи маълум қилди.

«Ливандаги ўт очишни тўхтатиш тартибига мувофиқ, Ҳўрмуз бўғози орқали барча тижорат кемаларининг ўтиши сулҳ амал қиладиган қолган давр учун тўлиқ очиқ деб эълон қилинади», — деб ёзди у Х ижтимоий тармоғида.

Ароқчининг қайд этишича, кемалар Эрон Портлар ва денгизчилик ташкилоти томонидан аввалроқ маълум қилинган «келишилган йўналиш» бўйлаб ҳаракатланишлари мумкин.

Февраль ойи охирида ҳарбий ҳаракатлар бошланганидан бери Эрон бўғоз ёпилганини эълон қилган ва Ислом Республикаси расмийларининг рухсатисиз у ердан ўтишга уринган танкерларга дрон ҳамда ракеталар билан зарба бера бошлаган эди.

Ўтган ҳафта АҚШ ва Эрон икки ҳафталик сулҳ эълон қилганди. Америка етакчиси Дональд Трамп Ҳўрмуз бўғозининг зудлик билан очилишини келишув шарти сифатида кўрсатган, бироқ бу амалга ошмаган эди. Бунга жавобан АҚШ Эрон портларига кемалар киришини блоклашини маълум қилганди.

Сулҳ тузилганига қарамай, Исроил «Ҳизбуллоҳ» ҳаракати жойлашган Ливанга зарба беришда давом этди. АҚШ расмийлари ўт очишни тўхтатиш тартиби Ливанга тааллуқли эмаслигини таъкидлаган эди.

Тошкент вақти билан 17 апрелга ўтар кечаси Ливанда Исроил билан 10 кунлик сулҳ режими кучга кирди. Бу борадаги келишувга Ливан Президенти Жозеф Аун ва Исроил Бош вазири Биньямин Нетаньяҳу ўртасида Америка етакчиси Дональд Трамп воситачилигида эришилди.