Фото: Халқ сўзи

Наманганда кечадан эътиборан қишлоқ хўжалиги маҳсулотларининг анъанавий байрам савдо ярмаркалари иш бошлади. Вилоят марказининг «Истиқлол» кўчасида ташкил этилган кўчма дўконларда деҳқон ва фермер хўжаликларида етиштирилган мева-сабзавот ва бошқа озиқ-овқат маҳсулотлари аҳолига бозордагидан бирмунча арзон нархда тақдим этилмоқда.

Давлатобод туманидаги «Яшил деҳқон бозори»да ҳам ярмарка пештахталарига 30 дан ортиқ турда кундалик зарурий маҳсулотлар қўйилган.

— Байрам ярмаркаси савдоларининг афзал томони шундаки, нархлар қатъий ва харидор учун мақбул, бозордаги сингари тортишиб ўтирмайсиз, танлов ҳам бемалол, гўшт, тухум, балиқдан тортиб, гурунч, ширинлик ва цитрус меваларгача бор, — дейди тўрақўрғонлик меҳнат фахрийси Мамадали Алишеров мамнунлик билан. — Байрамни тўкин дастурхон атрофида нишонлашимиз учун бундай ярмаркаларнинг ташкил этилиши айни муддао бўлмоқда.

Байрамолди ва байрам кунларида - уч ҳафта давом этадиган Янги йил савдо ярмаркалари Наманган вилоятининг барча туман марказларида хизмат кўрсатмоқда.

Қудратилла НАЖМИДДИНОВ, «Халқ сўзи».