Фото: "Халқ сўзи"

Бу давлат хизматлари кўрсатиш тизими тобора такомиллашиб бораётгани шарофатидир. Мисол учун, биргина кадастр ҳужжатини тайёрлаш учун аризани давлат хизматлари марказлари орқали юбориш аҳоли ва тадбиркорларни ортиқча югур-югурлардан халос этмоқда. Тан олиб айтиш керак, ташкилотлар ўртасида ахборот алмашинуви йўқлиги боис айни йўналишдаги хизматлар сифатидан аҳолининг унча кўнгли тўлмагани ҳам бор гап. Чунки кадастр паспорти, фуқароларнинг номида шахсий тураржой мавжуд ёки мавжуд эмаслиги тўғрисида маълумотнома олиш, ер участкасидан фойдаланиш ҳуқуқини рўйхатдан ўтказиш учун яқин кунларгача  фақатгина кўчмас  мулк жойлашган ҳудуддаги кадастр бўлимига мурожаат қилинган.

 - Энди  ушбу ҳужжатларни экстерриториал тартибда давлат хизматлари марказидан олиш имконияти  яратилди, -дейди Давлат хизматлари агентлиги Наманган вилоят бошқармаси ахборот хизмати раҳбари  Фозилжон Жўрабоев. -   Янги тартибга кўра, квартира учун кадастр паспортини 3 иш кунида, ҳовли учун 5 иш кунигача бўлган муддатда олиш мумкин. Кадастр паспорти йўқолганда қоғоз ёки пластик шаклдаги янги паспорт эса икки  иш куни мобайнида берилади.

Мутахассисларнинг айтишича, кўчмас мулк объектларининг нотурар жойга оид қисми бўйича ҳужжат майдонига қараб 5 иш кунидан 25 иш кунига қадар бўлган муддатда тайёр бўлади. Илгари бу борада ҳам ноқулайликлар кузатилган. Боиси, кўчмас мулк объектига бўлган ҳуқуқ тури ёки эгаси ўзгарганда, лекин объектнинг техник параметрлари ўзгармаган тақдирда ҳам мажбурий равишда кадастр паспортини қайта расмийлаштириш керак бўлар эди. Бу билан  фуқароларнинг икки маротаба тўлов қилишига тўғри келган. Ҳозирда бу амалиёт бекор қилинди. Шунингдек, янги тартибга кўра, кўчмас мулк объекти эгаси ўзгарганда композит хизматдан фойдаланиб, бир ариза билан реестрдан кўчирма ва кадастр паспортини бир вақтда олиш имкони яратилди.

Қудратилла НАЖМИДДИНОВ, “Халқ сўзи”.