Экспорт кўлами 5 миллион долларга яқинлашди
Оролбўйида пандемия даврида карантин қоидаларига қатъий амал қилиб, сифатли маҳсулот ишлаб чиқараётган ҳамда ташқи бозорларда ўзининг муносиб ўрнини эгаллаётган ўндан зиёд корхона мавжуд.
Қонликўл туманидаги “KANTEKS INVEST” масъулияти чекланган жамияти ана шундай йирик субъектлардан бири. Хорижнинг замонавий илғор технологиялари билан таъминланган мазкур жамоа жорий йил бошидан буён 4 миллион 945 минг АҚШ долларилик 2103 тонна калава ип экспортини амалга оширди.
— Ҳукуматимиз томонидан тадбиркорлик субъектларига яратиб берилаётган кенг имтиёз ва қулайликлар фаолиятимиз ривожида муҳим омил бўлмоқда, — дейди корхона директори Қувондиқ Ешмуратов. —Хусусан, яқинда Қорақалпоғистон Республикаси божхона бошқармасининг «Қўнғирот» ташқи алоқалар божхона пости ходимлари корхонамизда бўлиб, маҳсулот экспорти кўламини янада ошириш бўйича қимматли маслаҳатларини беришди. Бундай қулайликлар мамлакатимизга валюта кирими, қолаверса, янги иш ўринлари кўпайишига ҳам хизмат қилмоқда.
Ҳидоят АҲМEДОВ,
"Халқ сўзи" мухбири
Изоҳлар
Ҳозирча ҳеч ким фикр билдирмаган. Балки Сиз биринчилардан бўларсиз?
Изоҳ қолдириш учун тизимга киринг