Қирғизистон Соғлиқни сақлаш вазири Aлимкадир Бейшеналиев 19 январь куни Aмериканинг COVID-19га қарши Pfizer вакцинаси Қирғизистонга мос келмаслигини маълум қилди.

Маълумки, Қирғизистон вакцина ва эмлаш бўйича Глобал Иттифоқнинг COVAX дастурида иштирок этмоқда. Вазирнинг сўзларига кўра, Глобал Иттифоқ Қирғизистонга Aмериканинг Pfizer вакцинасини таклиф қилди. Унга кўра 1 миллион 200 минг доза вакцина бепул берилади. Бироқ, вакцина -70 даража ҳароратда сақланиши керак. Вакцинани олиб келиш, сақлаш ва аҳолини эмлаш учун махсус музлатгичлар зарур. Қирғизистонда бундай музлатгичлар йўқ. Шунингдек, битта музлатгич 4000 доллардан ошади. Pfizer вакцинасини сақлаш учун қўшимча 2 миллион доллар керак. «Aфсуски, бюджетда бунча пул йўқ», деди у.

Соғлиқни сақлаш вазирлиги Глобал Иттифоқдан иттифоқда мавжуд бошқа вакцинани сўрайди.

«Шунингдек, биз Россия ҳукумати билан Қирғизистонга вакцина етказиб бериш бўйича музокаралар олиб бормоқдамиз. Россия вакциналари -2 дан -18 даражагача бўлган ҳароратда сақланади. Бизда ушбу ҳароратни таъминлайдиган музлатгичлар бор», дея қўшимча қилди вазир.

«Koронавирус пайдо бўлганидан бери анча вақт ўтди ва биз Қирғизистонда вакцина ишлаб чиқарадиган завод қуриш ҳақида ўйлашимиз керак. Бу вакцина сотиб олгандан арзон бўлади», деди у.

Эслатиб ўтамиз, Қирғизистон Соғлиқни сақлаш вазирлиги 12 январь куни Pfizer вакцинасини ўрганиш бўйича ҳужжатларни олганини эълон қилган.