Фото: Иллюстратив фото

Сувнинг ҳар қатрасини ҳам беҳуда сарф этмаслик, хусусан, қишлоқ хўжалигига мўлжалланган сув ресурсларидан оқилона фойдаланиш ҳаётий заруратга айланганини ортиқча изоҳлаш шарт эмас. Глобал иқлим ўзгаришлари, сув танқислигининг наинки минтақамиз, балки дунё миқёсида долзарб муаммолардан бири эканини кўриб, билиб турибмиз. Зотан, сув тириклик манбаи, табиатнинг бебаҳо инъомидир.

Бироқ мана шу ҳақиқатни билсада, сув уволидан қўрқмай, исрофгарчиликка, аниқроқ айтганда, қонун бузилишларга йўл қўяётган кимсалар ҳам йўқ эмас.

Ўзбекистон Республикаси Вазирлар Маҳкамаси ҳузуридаги Агросаноат мажмуи устидан назорат қилиш инспекциясининг Пахтакор туман бўлими томонидан шу йилнинг биринчи чорагида сув исрофгарчилиги бўйича аниқланган 164 та қонун бузилиши ҳолатлари сўзимизни тасдиқлайди. Ўтган вақт давомида 133 та назорат тадбирлари олиб борилиб, шундан 27 таси текшириш ва 106 таси мониторинг тарзида ўтказилган.

— Аниқланган қонун бузилишлар юзасидан 20 нафар жисмоний шахсга маъмурий баённома расмийлаштирилиб, уларга нисбатан 5 миллион 400 минг сўмлик жарима жазо чоралари қўлланилган, — дейди инспекциянинг Пахтакор туман бўлими катта инспектори Ойбек Тожалиев. — Шунингдек, 3 та ҳолат бўйича тўпланган материаллар суд идораларига тақдим қилинди. Жумладан, Пахтакор туманидаги «Нўмон Ота» фермер хўжалигига тегишли ғалла майдонининг 0,15 гектарида, «Пахтакор Алпомиши» ва «Солинлик Муродбой ери» фермер хўжаликлари ғалла майдонларининг ҳам анча қисмида сизот суви сатҳининг ортиши ҳосилдорликка жиддий зарар етказган ҳамда ушбу фермер хўжаликларида шўр ювиш ишларини олиб бориш давомида эҳтиёждан ортиқча сув олиниб, шунчаки зовурга ташлаб қўйилиши оқибатида катта миқдорда сув исроф бўлган.

Инспекциянинг туман бўлими томонидан қонун бузилишларнинг олдини олиш ва ҳуқуқбузарликларни келтириб чиқармаслик юзасидан 136 та ёзма кўрсатма ҳамда тумандаги 247 та фермер хўжаликлари раҳбарларига сув ва сув ресурсларидан самарали фойдаланиш юзасидан огоҳлантириш хатлари юборилган.

Шу билан бирга инспекциянинг ўтказган назорат тадбирлари натижасида туманда 28 минг куб сувни иқтисод қилишга эришилган.

Толибжон ЭРГАШEВ, «Халқ сўзи».