Фото: Reuters

Бразилиянинг собиқ президенти Жаир Болсонару АҚШдаги касалхоналардан бирига ётқизилган. "Globo" ёзишича, уни қорин оғриғи безовта қилган. Болсонару 2018 йилда пичоқланиб, жарроҳи столига ётқизилганидан сўнг бир неча бор қорин қисмидаги оғриқ билан касалхонага ётқизилган. Охирги марта у 2022 йилнинг ноябрь ойида Бразилия Қуролли кучлар госпиталида муолажа олган эди.

Олдинроқ, Бразилияда хавфсизлик кучлари республика собиқ президенти Жаир Болсонару тарафдорлари лагерини тарқатиш чоғида 1,2 минг нафар намойишчиларни ҳибсга олгани ҳақида хабар берган эдик.

Ҳибсга олинганлар Бразилия федерал округининг жанубига олиб кетилган.

8 январь куни Бразилия пойтахтида собиқ президент Жаир Болсонару тарафдорлари уюштирган тартибсизликлар сабабли фавқулодда ҳолат эълон қилинганди. Таъкидланишича, улар амалдаги ҳукумат истеъфосини талаб қилишмоқда.

Жорий йилнинг 1 январь куни Луис Инасиу Лула да Силва мамлакат Конгрессидаги инаугурация маросимида қасамёд қилиб, учинчи марта Бразилия президенти сифатида фаолиятига киришган эди. 

Силва ўз нутқининг катта қисмини ўзидан олдинги президент Жаир Болсонару бошқаруви пайтида юзага келган «ҳалокатлар»га бағишлади.

«Улар атроф-муҳитни вайрон қилдилар, ҳеч қандай манба қолдирмадилар. Бу харобалардан мен мамлакатни қайта тиклашга ваъда бераман», — деди у.

Силва иқтисодий сиёсат Бразилияни қайта саноатлаштиришга йўналтирилишини қўшимча қилди. Мамлакат Аргентина, Парагвай ва Уругвай билан муносабатларни ривожлантириш, шунингдек, АҚШ, Европа Иттифоқи ва Хитой билан фаол мулоқот олиб бориш ниятида.

Унинг таъкидлашича, Бразилия ўз тақдирининг бунёдкорига айланиши керак.