Беларусь президенти Александр Лукашенко бугунги кунгача Давлат ҳарбий-саноат қўмитаси раиси лавозимида ишлаб келган Роман Головченкони Бош вазир этиб тайинлади. Бу ҳақда «Дунё» АА хабар берди.

Беларусь президентининг Роман Головченко ҳақидаги сўзларини келтирар экан, «БелТА» ахборот агентлиги унинг турли лавозимларда ишлаган юқори малакага эга мутахассислиги, жумладан, дипломатия соҳасидаги фаолиятидан келиб чиқиб, музокаралар ўтказишни пухта эгаллагани, шунингдек ҳарбий-саноат мажмуасини бошқарганини таъкидлади.

Янги Бош вазир 47 ёшда. У Фавқулодда ва Мухтор элчи дипломатик рангига эга. Инглиз, араб, немис ва поляк тилларини билади.

Беларуснинг Хитойдаги элчиси лавозимида ишлаган Николай Снопков Бош вазирнинг биринчи ўринбосари этиб тайинланди. Шунингдек, республика вазирлик ва идораларида қатор тайинловлар амалга оширилди.

Мамлакат Вазирлар кенгашини 2018 йилдан буён Сергей Румас бошқариб келган эди. Александр Лукашенко тадбиркорликни ихтиёр этган собиқ бош вазирга ҳеч қандай эътирози йўқлигини, аксинча унинг ушбу қарорини маъқуллаганини маълум қилган.