Энергетика вазирлиги автомобилларга ёқилғи қуйиш шохобчаларида автобензиннинг сифати бўйича шубҳа туғилса кимга ва қандай мурожаат қилиш кераклиги тўғрисида маълумот берди.

Унда айтилишича, ёнилғи сотиб олинган ёқилғи қуйиш шохобчасининг тўлиқ номи ва манзили, шунингдек, маҳсулот учун тўлов амалга оширилганлигини тасдиқловчи чек сақланган бўлиши лозим.

Агар автотранспорт воситасининг двигателида носозлик айнан сифатсиз ёнилғи сабабли келиб чиққан бўлса, двигатель таъмири олиб борилаётган техник хизмат кўрсатиш шохобчасининг расмий тасдиқланган хулосаси талаб этилади.

«Сифат текшируви фақат шубҳа туғилган ёқилғи қуйиш шохобчаларда сақланаётган нефть маҳсулотларидан белгиланган стандарт талаблар асосида намуна олиш орқали амалга оширилади ва кимё-назорат лабораторияларида таҳлил қилинади», — дейилади вазирлик хабарида.

Истеъмолчилар шубҳа туғилган АЁҚШларда сифатсиз нефть маҳсулотларининг тарқатилишининг олдини олиш мақсадида, дарҳол «Ўзенергоинспекция»нинг 71 208-10-15 ишонч телефонига мурожаат қилишлари мумкин бўлади.

Энергетика вазирлик амалдаги тартиб-қоидаларга мувофиқ, автотранспорт воситаларининг ёнилғи бакидан нефть маҳсулотларидан намуна олиш ва унинг сифатини таҳлил қилиш белгиланмаганини эслатиб ўтган.