Ўзбекистон элчиси Абат Файзуллаев Австриянинг «Lasselsberger Group» компанияси директори Ёзеф Ласселсбергер билан учрашув ўтказди.

Музокаралар чоғида республикамиз иқтисодиётига тўғридан-тўғри хорижий инвестицияларни жалб қилиш ва вилоятларда янги инвестицион лойиҳаларни амалга ошириш масалалари муҳокама қилинди.

Учрашув доирасида томонлар Қашқадарё ва Самарқанд вилоятларида «Lasselsberger Group» компанияси билан ҳамкорликда бошланган инвестицион лойиҳаларни амалга ошириш ҳамда инвестицияларни ўзлаштириш жараёнини жадаллаштириш юзасидан ҳам фикр алмашди.

«Lasselsberger Group» компаниясига 1957 йилда Антон Ласселсбергер томонидан асос солинган ва қароргоҳи Пёхларн шаҳрида жойлашган. Компания минерал хом ашёлар, қурилиш материаллари ва керамик плиталар ишлаб чиқаришга ихтисослашган.

«Lasselsberger Group»нинг, Хитой, Россия, Венгрия, Малта, Чехия, Австрия, Словакия, Руминия, Қозоғистон сингари 20дан ортиқ давлатларда 80 га яқин ишлаб чиқариш қувватлари мавжуд. Унинг товар айланмаси 2,2 миллиард еврони, ишчилари сони эса 10 мингдан ортиқни ташкил этади.