Фото: Reuters

АҚШ президенти Дональд Трамп «NBC News» телеканалига берган интервьюсида Украинага қурол етказиб бериш режаси ҳақида гапирди.

«Биз НАТОга қурол жўнатамиз ва НАТО бу қуроллар нархини тўлиқ қоплайди», — дейди Оқ уй раҳбари.

Бу Трамп президентликка қайтганидан кейин Украинага қурол етказиб бериш бўйича аниқ шахсий ниятини биринчи марта эълон қилишидир. Ҳозирча гап тахминан 300 миллион долларлик пакет ҳақида кетмоқда, унга «Patriot» ракеталари ва ўрта масофага мўлжалланган ракеталар киради.

Бошқа бир манбага кўра, таъминотлар нафақат ҳаво ҳужумига қарши мудофаа тизимлари, балки ҳужум қуролларини ҳам ўз ичига олиши мумкин. Исмини ошкор этмаган бошқа бир расмийнинг аниқлик киритишича, Европа иттифоқчилари орқали етказиб бериш схемаси муҳокама қилинган, аммо якуний режа номаълумлигича қолмоқда.

Аввалроқ, Трамп Киевга Украина президенти Владимир Зеленский ундан сўраган бир қанча ҳарбий ёрдам беришга рози бўлгани маълум бўлган эди.

Трамп, шунингдек, Кремлга нисбатан сиёсати ҳақида муҳим баёнот беришини маълум қилди.

«Ўйлайманки, душанба куни Россия бўйича муҳим баёнот беришга мажбур бўламан», — дейди у.

Оқ уй раҳбари нима ҳақида гапираётганига аниқлик киритмади, бироқ сўнгги кунларда Трампнинг Владимир Путинга нисбатан риторикаси ўзгарган. У бир неча бор ҳафсаласи пир бўлганини билдирган ва ҳатто Кремль раҳбарининг чиқишларини «бемаънилик» деб таърифлаган.

Россия томони ҳозирда бунга вазминлик билан муносабат билдирмоқда. Мамлакат ташқи ишлари вазири ўринбосари Сергей Рябков Трамп маъмурияти кўп масалаларда «зигзаг» қилаётганига қарамай, Россия-Америка муносабатларида «ижобий динамика сақланиб қолаётганини» айтди.