Иллюстратив фото

АҚШнинг Тайванга қурол сотиши оролни “порох бочкаси”га  айлантириб, унинг аҳолисини жиддий хавф остига қўймоқда. Бу фикрларни Хитойнинг Вашингтондаги элчихонаси матбуот котиби Лю Пэнъюй айтиб ўтди.

“АҚШнинг Тайванга қурол сотиши “ягона Хитой” тамойили ва Хитой ва АҚШ ўртасидаги учта қўшма коммюникенинг жиддий бузилишидир”, деди у.

Унинг қўшимча қилишича, Америка Қўшма Штатларининг бундай ҳаракатлари “Тайвань мустақиллиги” тарафдори бўлган кучларга нотўғри сигнал юборади. Лю Пэнъюй Пентагоннинг Америка компаниясига Тайвань учун тўртта “MQ-9B SkyGuardian” дронларини ишлаб чиқариш бўйича 250 миллион долларлик шартнома тақдим этишини шундай изоҳлади.

Шу ўринда Хитой томони яна Америка Қўшма Штатларини “ягона Хитой” тамойили ва учта қўшма коммуникега риоя қилишга ва Тайванга қурол сотишни тўхтатишга чақиради.

Аввалроқ, Хитой Халқ Республикаси Давлат Кенгаши Бош вазири Ли Цян Пекин ягона Хитой мавжудлиги ҳақидаги қабул қилинган тамойилга асосланиб, Тайвань мустақиллигига ва учинчи давлатларнинг оролнинг суверенитети масаласига аралашишига қарши чиқишда давом этишини айтган эди.

Шу билан бирга, Ли Цян Пекин Хитой иқтисодиётининг “материкда ҳам, оролда ҳам” интеграциялашуви ва ривожланишидан манфаатдор эканини таъкидлади.