Фото: AP

Америка Қўшма Штатларининг 12 штатида листериоз касаллигининг тарқалиши кузатилмоқда. Расмий маълумотларга кўра, ушбу хасталик билан 28 киши касалхонага ётқизилган, яна тўрт киши вафот этган. У билан боғлиқ ўлим ҳолатлари Иллинойс ва Нью-Жерси штатларида, энг кўп касалланганлар Мэриленд ва Нью-Йоркда қайд этилган.

Касалликларни назорат қилиш ва олдини олиш федерал марказларининг хабар беришича, касалланган 10 кишидан тўққиз нафари дўконларда сотиб олинган гўшт истеъмол қилган. Бироқ хасталикка қайси гўшт сабаб бўлгани ҳозирча аниқланмаган.

Листериоз юқумли касаллик бўлиб, кўплаб клиник кўринишларга эга. Жумладан, у асаб тизими ва лимфа тугунларини шикастлайди. Унинг тарқалишига одатда тупроқда ёки силосда яшайдиган бактериялар сабаб бўлади. Улар сабзавот ва ҳайвон маҳсулотлари билан бирга инсон танасига кириши мумкин.

Шу ҳафта бошида Канада ҳукумати листериознинг авж олганини эълон қилди. Мамлакатнинг Онтарио, Квебек ва Янги Шотландия провинцияларида у билан боғлиқ ҳолатлар қайд этилган.

Икки киши касалликдан вафот этган, яна тўққиз киши касалхонага ётқизилган. Таъкидланишича, касалланганлар ўсимликдан олинган салқин ичимликлар истеъмол қилган.