Фото: uzreport.news

Бугун, 3 март куни эрта тонгда АҚШга ноқонуний йўллар билан кетган 74 нафар ўзбекистонлик Ватанга қайтарилди.

Маълум бўлишича, уларнинг кўпчилиги Мексика орқали АҚШга ўтишган. Шунингдек, бир қанча бошқа давлатлар орқали борган фуқаролар ҳам бор. Улар АҚШ ҳудудига киргунича турли қийинчиликларга дуч келишган.

Ана шундай йўллар билан АҚШга борган юртдошимиз ўз бошидан ўтган қийинчиликларини сўзлаб берди.

— Багажимни йўқотиб, тўсатдан Мадридга учганман. Ушбу шаҳарда билет йўқолиб қолиб, 14 кун давомида 400 та ўзбек Мадридда “хор бўлган”. Шу ердан Туркияга депорт қилинганмиз, — дейди у. — Кейинчалик Гуатемалага бордик ва яна ҳаракат қилиб кўрдик. 2 марта чегарадан қайтарилиб, иммиграцион жойда 2 сутка ётганман. Венесуэла фуқаролари билан пиёда 3 кун юрганмиз. У ерда ҳам қочдик, юрдик, ўликларни ҳам ҳамма нарсани кўрдик. Маслаҳат бермайман, Америка шунчаки реклама. 10 минг АҚШ долларига яқин пулим кетди. Июлда уйимдан чиққан бўлсам, август ойида мен ушбу давлатга етиб бордим. Лекин ишлай олмадим. Пул сарфлаб, сарфлаб қайтдик. Бормоқчи бўлганларга маслаҳатим борманглар. Касаллик орттириб қайтасиз. Ҳаммаси ёлғон.

Эслатиб ўтамиз, 2023 йилнинг 20 декабрида ҳам АҚШга ноқонуний йўллар билан кетган 119 нафар ўзбекистонлик ватанга қайтарилган эди.