АҚШда 12 ёшгача бўлган болаларни ҳам "COVID-19"га қарши эмлашга рухсат берилиши кутилмоқда
Иллюстратив фото
АҚШ Озиқ-овқат ва дори воситалари назорати бошқармаси (Food and Drug Administration – FDA) жорий йил қишининг бошига ёки ўрталарига қадар мамлакатда 12 ёшгача бўлган болаларни ҳам "COVID-19"га қарши эмлашга фавқулодда рухсатнома беришга тайёрланмоқда. Бу ҳақда "NBC" телеканали FDA вакилига таяниб хабар бермоқда.
Ҳозир АҚШда 12 ёшдан 18 ёшгача бўлган болаларни фавқулодда эмлашга рухсат берилган. Аммо мамлакатда кенг фойдаланилаётган вакциналардан ҳеч бири — на "Pfizer-BioNtech", на "Moderna" ҳали болаларда фойдаланиш учун тўлиқ тасдиқланмаган.
FDA вакилига кўра, бу АҚШ ва бошқа мамлакатларда ота-оналарнинг фарзандлари учун эмлаш хавфсизлиги тўғрисидаги турли шубҳалардан кечишига ёрдам беради.
Аввалроқ, россиялик вирусолог Анатолий Альтштейн ўсмирларни коронавирусга қарши эмлаш нафақат уларни, балки жамиятни ҳам ҳимоя қиладиган профилактик чора эканини айтиб ўтган эди.
Унинг сўзларига кўра, ўсмирлар ҳам катталар каби касалликни бир хил ташувчилари ҳисобланади.
Изоҳлар
Ҳозирча ҳеч ким фикр билдирмаган. Балки Сиз биринчилардан бўларсиз?
Изоҳ қолдириш учун тизимга киринг