Фото: AP

Америка Қўшма Штатлари Қуролли Кучлар Марказий қўмондонлигининг Яқин Шарқдаги масъулият ҳудудига қўшимча 300 нафар ҳарбий хизматчини юборишга қарор қилди. Бу ҳақда Пентагон матбуот котиби Патрик Райдер журналистлар билан бўлиб ўтган брифингда маълум қилди.

“Қўшма Штатлардаги континентал базаларимиздан масъулият ҳудудига қўшимча 300 аскар юбориш қарорини эълон қилишга тайёрман”, деди у.

Райдернинг таъкидлашича, ҳарбийлар минтақада аллақачон жойлаштирилган қўшинларга портловчи ўқ-дориларни йўқ қилиш, алоқани таъминлаш, шунингдек, бошқа турдаги ёрдам кўрсатишда иштирок этади.

Шу йилнинг 31 октябрь куни Оқ уй Миллий хавфсизлик кенгашининг стратегик алоқалар бўйича координатори Жон Кирби АҚШ ҳозирда Фаластин-Исроил можароси ҳудудида ҳарбий ҳаракатларда бевосита иштирок этишни режалаштирмаётганини айтганди.

Бунгача “Axios” портали америкалик ва исроиллик расмийларга таяниб, АҚШ президенти Жо Байден маъмурияти Исроил ва Фаластиннинг ҲАМАС ҳаракати ўртасидаги Ғазо секторидаги можаро бутун Яқин Шарққа тарқалиши мумкинлигига тайёргарлик кўраётгани ҳақида ёзган эди.

29 октябрь куни “Stars and Stripes” нашри гувоҳлар ва таҳлилчиларга таяниб, АҚШнинг “Дуайт Эйзенхауэр” самолёт ташувчи кемаси Яқин Шарққа кетаётганда Гибралтар бўғозидан ўтгандан сўнг Ўрта Ер денгизида кема кузатувчилари ва разведка таҳлилчилари томонидан пайқалгани ҳақида хабар берганди.