Фото: aa.com.tr

АҚШ давлат котиби Энтони Блинкен Исроилга берилган Америка қуролларидан инсонпарварлик қонунлари ва уруш қонунларига мувофиқ қандай фойдаланаётганини кўриш Вашингтон учун муҳим эканини таъкидлаб, яҳудий давлатини шунга мувофиқ ҳаракат қилишга чақирди.

“Биз кўрсатадиган ҳар қандай ҳарбий ёрдам талабларга бўйсунади, шу жумладан бу қуроллар халқаро гуманитар ҳуқуқ ва уруш қонунларига мувофиқ қўлланилиши керак”, деди Блинкен.

Америка ташқи сиёсат департаменти раҳбари Қўшма Штатлар ушбу талаблар бажарилишини диққат билан кузатиб боришига ишонтирди. У буни жиддий қабул қилиш кераклигини таъкидлади.

Аввалроқ, “The Washington Post” нашри манбаларга таяниб, Исроил Ливанга қарши кенг кўламли операцияни бошласа, Яқин Шарқдаги можарода ғалаба қозонишда қийналиши ҳақида хабар берган эди.

Бунгача, “Politico” газетаси АҚШ Яқин Шарқда урушга тайёрланаётгани ҳақида хабар берганди.

Нашр суҳбатдошлари, жумладан, Оқ уйнинг юқори мартабали мулозимига кўра, АҚШ президенти Жо Байден маъмурияти Қўшма Штатларнинг Яқин Шарқдаги янги урушда эҳтимолий иштироки сценарийларини муҳокама қилмоқда.

“АҚШ президенти Жо Байден маъмурияти Фаластин — Исроил можаросининг Яқин Шарқда янги урушга олиб келиши мумкин бўлган кучайишига ҳозирлик кўрмоқда”, дейилади газета хабарида.