АҚШ денгиз пиёдалари корпуси ҳарбийларига вазн ташлаш топшириғи берилди. Бу ҳақида BILD нашри маълум қилди.

Янги буйруққа кўра, АҚШ денгиз пиёдалари корпуси аскарларининг бел атрофи бўйининг максимал 52 фоизини ташкил этиши керак. Янги стандартда белнинг бўйга нисбати мезон сифатида ишлатилиши белгиланган.

Мазкур чеклов аввалги 0,55 фоиздан 0,52 фоизга ўзгартирилиб, эндиликда 1,70 метр баландликдаги аскарнинг бел айланмаси 88,4 сантиметр бўлиши керак. Аввалги кўрсаткич айнан шундай бўйга эга аскар учун 93,5 сантиметрни ташкил қилган.

«Task & Purpose» ҳарбий журналига кўра, озғин денгиз пиёдалари кўпинча жисмоний тайёргарлик бўйича яхшироқ натижаларга эришади.

«Денгиз пиёдалари корпуси жисмонан бақувват жангчиларни ривожлантиришга содиқ қолади», — дейди Генерал Эрик Смит.

Янги қоидаларга кўра, белгиланган нормалардан ошиб кетган аскарлар дарҳол қўшимча текширувдан ўтишлари шарт бўлади. Уларнинг тана ёғ фоизи ўлчанади ва жисмоний тайёргарлик тест натижалари қайта кўриб чиқилади. Тана ёғ фоизи эркаклар учун 26 фоиздан ва аёллар учун эса 36 фоиздан ошмаслиги лозим.

Янги стандартлар АҚШ мудофаа вазири Пит Ҳегсетнинг жисмоний тайёргарлик бўйича директивасига асосланган бўлиб, янги бел атрофи ўлчови юрак-қон томир касалликларининг олдини олишга ҳам хизмат қилиши айтилган.